(ෂේන් සෙනෙවිරත්න)

දිනකට පැය හතක් අටක් අඛණ්ඩව මාර්ගගත ක්‍රමය යටතේ විශ්වවිද්‍යාල සිසුන් අධ්‍යාපනය හැදෑරීම තුලින් ඇතිවන මානසික පීඩනය නිසා මනස රෝගී වූ විශ්ව විද්‍යාල සිසුන් ප්‍රතිකාර ලබා ලබා ගැනීමට යොමුවීමේ ප්‍රවණතාවය මේ වනවිට ඉහළ ගොස් ඇතැයි මහනුවර ජාතික රෝහලේ හිටපු මනෝ වෛද්‍ය විශේෂඥ ඩබ්ලිව්. ඒ. එල්. වික්‍රමසිංහ මහතා පවසයි.

පේරාදෙණිය විශ්වවිද්‍යාලයේ අධ්‍යාපනය හැදෑරූ සිසුන් තිදෙනකු ඉතා කෙටි කලක් තුළදී නිශ්චිත හේතු නොදක්වා සියදිවි හානි කර ගැනීම සම්බන්ධයෙන් විශේෂඥ වෛද්‍යවරයා ගෙන් කල විමසීමකදී ඔහු ඒ බව අවධාරණය කරමින් වැඩිදුරටත් මෙසේ පැවසීය.

මේ වන විට රටේ පවතින සමාජ වටපිටාව අනුව සියලු දෙනා කිසියම් හෝ ආතති තත්ත්වයකයි සිටින්නේ . විශේෂයෙන් අධ්‍යාපන කටයුතු වලදී විශ්වවිද්‍යාල සිසුන්ට එල්ල වන දැඩි පීඩනය පිළිබඳව ආචාර්ය මහාචාර්යවරු වැඩි සැලකිල්ලක් දැක්විය යුතුව තිබෙනවා .

මනෝ උපදේශන සේවා විශ්වවිද්‍යාල තුළ ක්‍රියාත්මක වෙමින් පවතිනවා. පවතින තත්ත්වය තේරුම්ගෙන එය වඩාත් විධිමත් කිරීමට වගකිවයුතු අංශ පියවර ගත යුතුව තිබෙනවා . විශ්වවිද්‍යාල සිසුන් සැම විටම තමන් පීඩා විඳින ප්‍රශ්න විශ්වාසවන්ත මෙන්ම අවබෝධයක් ඇති අයෙකුට පවසා තම මනස ලිහිල් කර ගත යුතුව තිබෙනවා .

සමාජයේ මේ වන විට ඇති වී තිබෙන අර්බුද හමුවේ සියලු ජනතාව කිසියම් හෝ ආතති තත්වයකයි පෙළෙන්නේ . එය මේසයක් මත සිටින පුද්ගල කණ්ඩායමකට සමානයි . පොළවේ සිටින පුද්ගලයකුට වඩා මේසය මත සිටින පුද්ගලයා වහලයට ළඟයි . ආතතිය වැඩි වූ කාරණාවක් නිසා මේසෙ උඩ සිටින පුද්ගලයා උඩ පැන්නොත් පොළවේ සිටින පුද්ගලයාට වඩා ඉතා ඉක්මනින් ඔහුගේ හිස වහලයේ වදින බවත් එය සමාජය තේරුම් ගත යුතුව තිබෙන බවද විශේෂඥ වෛද්‍යවරයා පැවසීය .