සෙලින්කෝ ලයිෆ් සමාගම සිය ‘ෆැමිලි සවාරි’ වැඩසටහනේ ඊළඟ අදියර සඳහා බොහෝ දෙනකු ආදරය කරන ‘පවුලේ අය සමග නිවාඩුවක් ගත කිරීම’ යන තේමාව නැවතත් එක්කර තිබේ. ඒ අනුව, එළඹෙන ‘ෆැමිලි සවාරි’ වැඩසටහනේ ත්‍යාග සඳහා සමාගම විසින් හෝටල්වල නිවාඩුවක් ගත කිරීම ඇතුළුව ජයග්‍රාහකයන්ට ත්‍යාග මාලාවක් ලබාදීමට තීරණය කර ඇත.  

ශ්‍රී ලංකාව ආර්ථික අර්බුදයකට මුහණදීම නිසා ජනතාවට සිදුවී තිබෙන අපහසුතා සැලකිල්ලට ගනිමින් එම සමාගම සඳහන් කරන්නේ මේ වනවිටත් ලබාදෙන මුදල් ත්‍යාග සහ වටිනා සුපිරි වෙළෙඳසැල් වවුචරද ‘ෆැමිලි සවාරි 16’ වන වැඩසටහනේදී බොහෝ දෙනකුට ත්‍යාග ලෙස ලබාදෙන බවයි.  

මෙවර ‘ෆැමිලි සවාරි’ වැඩසටහන යටතේ 2022 දෙසැම්බර් මාසයේ සිට 2023 අගෝස්තු මාසය දක්වා දිනුම් වාර 05 ක් පවත්වන අතර එහිදී ජයග්‍රාහකයන් ලෙස රක්ෂණ ඔප්පුහිමියන් 1,155 දෙනකු තෝරා ගැනීමට සමාගම තීරණය කර ඇත. මෙම සෑම දිනුම් ඇදීමකදීම රක්ෂණ ඔප්පු හිමි පවුල් තුනක සාමාජිකයන් ‘ප්‍රීමියර්’ කාණ්ඩයේ වර්ගීකරණයක් ලබා තිබෙන අති සුඛෝපභෝගී හෝටලයක ෆුල් බෝර්ඩ් පදනම යටතේ නිවාඩුවක් ගත කිරීමට තෝරා ගන්නා අතර තවත් රක්ෂණ ඔප්පු හිමි පවුල් තුනක සාමාජිකයන් ‘ඩිලක්ස්’ වර්ගීකරණයක් ලබා තිබෙන සුඛෝපභෝගී හෝටලයක ෆුල් බෝර්ඩ් පදනම යටතේ නිවාඩුවක් ගත කිරීම සඳහා තෝරාගනී. මීට අමතරව, මෙම සෑම දිනුම් ඇදීමකදීම තවත් රක්ෂණ ඔප්පුහිමියන් පස් දෙනකුට රුපියල් 100,000 ක් බැගින් වූ ත්‍යාග මුදල් ලබාදෙන අතර තවත් රක්ෂණ ඔප්පු හිමියන් 20 දෙනකුට රුපියල් 50,000 ක් බැගින් වූ ත්‍යාග ලබාදෙයි. එසේම, සෑම දිනුම් ඇදීමකදීම තවත් 50 දෙනෙකුට රුපියල් 25,000 ක් බැගින් වූ ත්‍යාග මුදල් ලබාදෙන බවත් තවත් රක්ෂණ ඔප්පු හිමියන් 150 දෙනෙකුට රුපියල් 10,000 ක වටිනාකමක් තිබෙන භාණ්ඩ මිලදීගැනීම සඳහා සුපිරි වෙළෙඳ සැල් වවුචර ලබාදීමට සමාගම තීරණය කර තිබේ.      

මේ අනුව, සමස්තයක් ලෙස ‘ෆැමිලි සවාරි 16’ වන වැඩසටහන මගින් සෙලින්කෝ ලයිෆ් සමාගම නිවාඩු පැකේජ 30 ක්, රුපියල් මිලියන 13.75 ක මුදල් ත්‍යාග, සහ රුපියල් මිලියන 7.5 ක සුපිරි වෙළෙඳසැල් වවුචර ප්‍රදානය කිරීමට කටයුතු යොදා තිබේ.

මෙම වැඩසටහන පිළිබඳව අදහස් දක්වමින් සෙලින්කෝ ලයිෆ් සමාගමේ සාමාන්‍යාධිකාරී - අලෙවිකරණ, සමිත හේමචන්ද්‍ර මහතා මෙසේ අදහස් දැක්වීය. ‘වසර දෙකකට පසුව යළිත් ෆැමිලි සවාරි සඳහා සවාරි අත්දැකීම එක් කිරීමට ලැබීම ගැන අපි අතිශයින්ම සතුටු වෙනවා. මෙම ප්‍රවර්ධන වැඩසටහනින් අපි සෑමවිටම උත්සාහ කරන්නේ පවුලේ සාමාජිකයන් සමග නිදහසේ කාලය ගත කිරීමේ අවස්ථාව උදා කරන්නයි. පවතින ආර්ථික තත්ත්වය නිසා බොහෝ දෙනකුට ඒ ආකාරයෙන් කටයුතු කිරීම අපහසු බව අපි දන්නවා. පවුලේ සාමාජිකයන් සමග නිවාඩුවක් ගත කිරීමේ අවස්ථාව යළිත් ලබාදීම නිසා වර්තමානයේ තිබෙන ආතතිය යම් පමණකට හෝ මෙයින් පහව යනු ඇතැයි අපි විශ්වාස කරනවා.’

595