(සී .ගමගේ)

නීති විරෝධි ලෙස බලපත්‍ර නොමැතිව ගවමස් කිලෝ 700ක්  හොරෙන් ප්‍රවාහනය කරමින් තිබූ  කුඩා ලොරියක් සහ වෑන් රථයක් සමඟ සැකපිට පුද්ගලයන් තිදෙනකු  අද (27) අලුයම බදුල්ල පිටපොල මාර්ගයේ දී අත්අඩංගුවට ගත් බව බදුල්ල කොට්ඨාස අපරාධ විමර්ශන කාර්යාංශය   පවසයි .

අත්අඩංගුවට ගත් රථ වාහන දෙක තුළ ඝාතනය කරන ලද ගවයින් හයදෙනෙකුගේ ගවඔලු තිබු බවත් ,ගවයින් හයදෙනෙකු මෙසේ ඝාතනය කර මස් ගෙන යමින් සිටි බවද පොලිසිය කීය .

මෙම ගවයින් අතර මීගවයින්ද ඝාතනය කර ඇති බවට එහි තිබූ ගවකුර වලින් අනාවරණය විනැයි පොලිසිය පැවසීය .

ලැබුණු තොරතුරක් මත අලුයම පිටපොල මාර්ගයේ රැකවලෙහි නිරතව සිටියදී පැමිණි කුඩා ලොරියක් සහ වෑන් රථයක් නැවතීමට සංඥා කිරිමේදී වෑන් රථය නවතා කුඩා ලොරිය නොනවත්වා පළාගොස් ඇතැයි පොලිසිය පවසයි .

ඒ සමගම වහා ක්‍රියාත්මක වූ පොලිස් නිලධාරීන් එම කුඩා ලොරිය පසුපස හඹාගොස් හාලිඇල මධ්‍යම පන්තික නිවාස යෝජනා ක්‍රමය අසල නිවසක නවතා තිබූ ලොරිය සමඟ සැකකරු අත්අඩංගුවට ගත් බවද පොලිසිය සදහන් කළේය .

මහියංගණ පගරගම්මන ප්‍රදේශයේ සිට මෙසේ ගවමස් හොර රහසේ විකිණීම සදහා බදුල්ල ,හාලිඇල නගරවල ගැණුම්කරුවන්ට ගෙන යමින් සිටි බවද පොලිසිය පැවසීය .