(අන්තර්ජාලය ඇසුරෙන් විමුක්ති එස් රුද්‍රිගු)

ඇමෙරිකානු ජනාධිපති ජෝ බයිඩන් මෙන් නොව තමා අභාවප්‍රාප්ත වූ දෙවැනි එළිසබෙත් රැජිනට ද්‍රෝහි වූ හැරී කුමරුට කෙදිනකවත් ආරක්ෂාව ලබා නොදෙන බව ඩේලි එක්ස්ප්‍රස් පුවත්පතට සම්මුඛ සාකච්ඡාවක් ලබා දෙමින් ඇමෙරිකානු හිටපු ජනාධිපති ඩොනල්ඩ් ට්‍රම්ප් ප්‍රකාශ කළේය.

ඇමෙරිකාවට පැමිණීම සඳහා ආගමන ලේඛනවලට අසත්‍ය තොරතුරු ලබා දී ඇතැයි චෝදනා කරමින් හැරී කුමරුට එරෙහිව ගොනු කර ඇති නඩුවට ඔහු මුහුණ දුන් දිනට පසුදින ඩොනල්ඩ් ට්‍රම්ප් මෙම ප්‍රකාශය සිදු කළේය.මෙම නඩුව හෙරිටේජ් පදනම මගින් හැරී කුමරුට විරුද්ධව ගොනු කර තිබිණ.

හැරී කුමරු මත්ද්‍රව්‍ය වලට පුරුදු වී සිටි බවට තොරතුරු ආගමන ලේඛනයෙන් වසන් කර ඇති බවත් ස්පෙයාර් චරිතාපදානයේදී මත් ද්‍රව්‍යවලට පුරුදු වී සිටි බව හැරී කුමරු පිළිගෙන ඇති බවත් හෙරිටේජ් පදනම ගොනුකර චෝදනාවේ සඳහන් වේ.

පසුගියදා පැවති එම නඩු විභාගයේදී හැරී කුමරු සිය චරිතාපදානය අලෙවි කර ගැනීමේ අරමුණින් මත්ද්‍රව්‍ය භාවිත කළ බවට අසත්‍ය තොරතුරු එහි සඳහන් කර ඇති බවට නීතිඥවරු තර්ක කළහ.

හැරී කුමරුගේ ආගමන තොරතුරු වසන් කරමින් ඇමෙරිකානු ජනාධිපතිවරයා හැරී කුමරුට ආරක්ෂාව සපයන බවත් තමන් කෙදිනකවත් එසේ නොකරන බවත් ඩොනල්ඩ් ට්‍රම්ප් සම්මුඛ සාකච්ඡාවේදී ප්‍රකාශ කළේය.එළිසබෙත් රැජිනට ද්‍රෝහි වීම කෙදිනකවත් සමාව දිය හැකි කරුණක් නොවන බවද ට්‍රම්ප් පැවැසුවේය.හැරී කුමරුගේ ක්‍රියා කලාපය නොසලකා හරිමින් ඇමෙරිකානු ජනාධිපතිවරයා හැරී කුමරුට ඕනෑවට වඩා කරුණාවන්ත වී ඇතැයි ට්‍රම්ප් සඳහන් කළේය.