(මනෝප්‍රිය ගුණසේකර)

ගෝඨා ගෝ ගම අරගලයට පහරදමේ සිද්ධියේ සැකකරුවන්ට ඇප දීමේදී මහේස්ත්‍රාත්වරු ක්‍රියාත්මක වූ ආකාරය පිළිබඳව විවේචනාත්මක අදහස් පළ කිරීම සම්බන්ධයෙන් පොදුජන එක්සත් පෙරමුණේ පුත්තලම දිස්ත්‍රික් පාර්ලිමේන්තු මන්ත්‍රී සනත් නිශාන්ත මහතාට අධිකරණයට අපහාස කිරීමේ චෝදනාවට වරදකරු කොට දඬුවම් පමුණුවන්නැයි ඉල්ලා අධිකරණ සේවා සංගමය අභියාචනාධිකරණයට අද (03) පෙත්සමක් ඉදිරිපත් කෙරිණී.

මහෙස්ත්‍රාත්වරු හා දිසා විනිසුරුවරුන් සාමාජිකත්වය දරණ අධිකරණ සේවා සංගමය විසින් ඉදිරිපත් කොට ඇති මෙම පෙත්සම මඟින් පාර්ලිමේන්තු මන්ත්‍රී සනත් නිශාන්ත මහතාට එරෙහිව නඩු විභාගයක් පවත්වා ආණ්ඩුක්‍රම ව්‍යවස්ථාවේ 105 (3) වගන්තිය යටතේ අධිකරණයට අපහාස කිරීමේ චෝදනාවට ඔහුට දඬුවම් පමුණුවන්නැයි ඉල්ලීමක් කොට ඇත.

මහෙස්ත්‍රාත්වරු හා දිසා විනිසුරුවරුන් සාමාජිකත්වය දරණ අධිකරණ සේවා සංගමය විසින් ඉදිරිපත් කොට ඇති මෙම පෙත්සමේ වගඋත්තරකරුවන් වශයෙන් නීතිපතිවරයා සහ පාර්ලිමේන්තු මන්ත්‍රී සනත් නිශාන්ත මහතා නම් කොට ඇත.

නීතීඥ චන්ද්‍රකුමාර මහතාගේ උපදෙස් මත මෙම පෙත්සම ඉදිරිපත් කරන අධිකරණ සේවා සංගමය ගාලු මුවදොර, ගෝඨා ගෝ ගම අරගලයට පසුගිය මැයි මස 09 වැනිදා පහරදමේ සිද්ධියට අදාළව රහස් පොලිසිය කොටුව මහේස්ත්‍රාත් අධිකරණය හමුවේ පැමිණල්ලක් ගොනුකර ඇතැයි සඳහන් කොට ඇත.

පාර්ලිමේන්තු මන්ත්‍රී සනත් නිශාන්ත මහතා එහි සැකකරුවකු ලෙස නම් කර ඇති බවත් සඳහන් කරන පෙත්සම්කාර සංගමය ඒ සම්බන්ධයෙන් සැකපිට අත්අඩංගුවට ගනු ලැබ රිමාන්ඩ් බාරයට පත් කොට සිටි

ඔහු පසුව ඇප මත මුදා හැර ඇති බවත් අධිකරණ සේවා සංගමය ඉදිරිපත් කළ පෙත්සමමේ සඳහන් කොට ඇත.

ඉන් අනතුරුව ශ්‍රී ලංකා පොදුජන පෙරමුණ පක්ෂ මූලස්ථානයේ පසුගිය 23 වැනිදා පැවැති මාධ්‍ය හමුවකදී මෙන්ම වෙනත් මාධ්‍ය වලට වගඋත්තරකාර සනත් නිශාන්ත මහතා අදහස් දක්වමින් අරගලයට සම්බන්ධ සැකකරුවන්ට ඇප දීමේදී මහේස්ත්‍රාත්වරු ක්‍රියාත්මක වූ ආකාරය පිළිබඳව විවේචනාත්මක අදහස් පළ කොට ඇතැයිද ඉන් ඔහු අධිකරණයේ ගෞරවයට සහ ප්‍රතිරූපයට හානි සිදුකර ඇතැයිද සඳහන් කරන
පෙත්සම්කාර අධිකරණ සේවා සංගමය එමඟින් සනත් නිශාන්ත මන්ත්‍රීවරයා ආණ්ඩුක්‍රම ව්‍යවස්ථාවේ 105 (3) වගන්තිය යටතේ අධිකරණයට අපහාසයක් සිදු කර ඇතැයිද සඳහන් කොට ඇත.

සනත් නිශාන්ත මන්ත්‍රීවරයා පසුගිය 23 වැනිදා මාධ්‍ය හමුවේ දී පළ කළ අදහස් විකාශනය කළ සිරස, ස්වර්ණවාහිනී හා සියත රූපවාහිනි නාළිකාවලින් ඊට අදාල මුල් වීඩියෝ පට අධිකරණයට කැඳවීමේ නියෝගයක් නිකුත් කරන්නැයිද සනත් නිශාන්ත මහතාට එරෙහිව අධිකරණයට අපහාස කිරීම සම්බන්ධයෙන් චෝදනා පත්‍රයක් ගොනු කරන ලෙස නීතිපතිවරයාට නියෝගයක් නිකුත් කරන්නැයිද ඉන් අනතුරුව ඔහු සිතාසි මත අධිකරණයට කැඳවා දඩූවම් නොකිරීමට ඔහුගෙන් හේතු විමසන්නැයිද අධිකරණ සේවා සංගමය ඉල්ලීමක් කොට ඇත.

ඊට අමතරව නඩු විභාගයක් පවත්වා ආණ්ඩුක්‍රම  ව්‍යවස්ථාවේ 105(3) වගන්තිය යටතේ අධිකරණයට අපහාස කිරීමේ චෝදනාව සම්බන්ධයෙන් සනත් නිශාන්ත මන්ත්‍රීවරයාට දඬුවම් පමුණුවන්නැයි ඉල්ලා සිටින පෙත්සම්කාර අධිකරණ සේවා සංගමය අධිකරණයට අහාසාත්මක විය හැකි ප්‍රකාශ නිකුත් කිරීමෙන් සනත් නිශාන්ත මන්ත්‍රීවරයා වළක්වන අතුරු නියෝගයක් නිකුත් කරන්නැයිද ඉල්ලීමක් කොට ඇත.