(දයාරත්න ඇඹෝගම)

අනුරාධපුර ශික්ෂණ රෝහලේ පිලිකා වාට්ටුවේ ඉඩකඩ ප්‍රමාණවත් නොවිම නිසා තමන් දැඩි අපහසුතාවයකට පත්ව සිටින බව රෝගිහු පවසති.

පොලොන්නරුව,ත්‍රිකුණාමලය සහ පුත්තලම යන ප්‍රදේශවල පදිංචි රෝගිහු ප්‍රතිකාර සඳහා අනුරාධපුර ශික්ෂණ රෝහලට දුරකතර ගෙවා පැමිණෙති.

දිනකට පිලිකා රෝගිහු ප්‍රතිකාර සදහා 700 කට අධික ප්‍රමාණයක් පැමිණෙති. මෙම හේතුවෙන් පිලිකා වාට්ටුවේ පවතින්නේ දැඩි තදබදයකි.

රෝගීන් තිදෙනෙකුට ඇත්තේ එකම ඇදකි.තවත් රෝගින් විශාල ප්‍රමාණයක් වැතිර සිටින්නේ පොලොව මත එලාගත් රෙද්දක් මතය.

සේලයින් පවා රෝගින්ට ලබාදෙන්නේ පුටුවක වාඩිකරමිණි.

මෙම පිලිකා වාට්ටුවේ පවතින තදබදයට පිලියමක් ලෙස පිලිකා වාට්ටු සංකිර්ණයක් මිට වසර දහයකට පෙර සැළසුම් කර තිබුනද එහි ඉදිකිරිම් කටයුතුද ඇණහිට තිබේ.

අනුරාධපුර ශික්ෂණ රෝහලේ පිලිකා වාට්ටුවේ ඇතිවි තිබෙන මෙම තදබදය අවම කිරිම සදහා කඩිනමින් පියවර ගන්නා ලෙස පිලිකා රෝගින් හා ඔවුන්ගේ බාරකරැවන් වගකිව යුත්තන්ගෙන් ඉල්ලා සිටිති.

මේ සම්බන්ධයෙන් අනුරාධපුර ශික්ෂණ රෝහලේ අධ්‍යක්ෂ වෛද්‍ය දුලාන් සමරවීර මහතා ගෙන් සිදුකළ විමසුමේදි ඒ මහතා මෙසේ පැවසිය.

‘දිනකට රෝගින් 700 ක් පමණ ප්‍රතිකාර සදහා රෝහලට පැමිණෙනවා.පසුගිය වසර දෙකක කාලයක් තිස්සේ පිලිකා රෝගින් ගේ ප්‍රමාණය වැඩිවි තිබෙනවා.වාට්ටුවේ තිබෙන ඇදන් ප්‍රමාණයට වඩා රෝගීන් 60%ක්70% වැඩිවෙලා. මේ සදහා පිලියමක් විදියට දැනට වසර දහයකට පෙර පිලිකා වාට්ටු සංකීර්ණයක් ඉදිකිරිම සෞඛ්‍ය අමාත්‍යංශයෙන් ආරම්භ කර තිබුණත් එහි ඉදිකිරිම් කටයුතුද අතර මග ඇණහිට ඇතැයි අධ්‍යක්ෂකවරයා පැවසිය.