(සුජිත් හේවාජුලිගේ සහ  අංජුල මහික වීරරත්න)

සේවක අර්ථසාධක අරමුදලට ලියාපදිංචි කිරීමේ කටයුතු නවීන තාක්ෂණය භාවිතයෙන්  කිරීමටත්   සේවක අර්ථසාධක අරමුදලේ සාමාජිකයින්ට තම මාසික දායක මුදල් ගිණුම්ගතවී ඇති ආකාරය ජංගම දුරකතන කෙටි පණිවිඩ සේවාව ඔස්සේ (SMS) ලබා දීමටත්  කම්කරු අමාත්‍යාංශය තීරණය කර ඇත.

මීට අවශ්‍ය නීතිමය  ප්‍රතිපාදන සැලසීම සඳහා සේවක අර්ථසාධක අරමුදල් පනත යටතේ නියෝගයක් පාර්ලිමේන්තුවේදී අනිද්දා (07) සම්මත කර ගැනීමට කරගැනීමට නියමිතය.

මේ අතර සේවක අර්ථසාධක අරමුදල් (සංශෝධන) පනත් කෙටුම්පත දෙවැනිවර කියැවීම සඳහා  පාර්ලිමේන්තුවට ඉදිරිපත් කිරීමට කම්කරු කටයුතු පිළිබඳ අමාත්‍යාංශයීය උපදේශක කාරක සභාවේදී එකඟතාව පළ විය.

එසේම සේවක අර්ථසාධක අරමුදල් පනත යටතේ නියෝගයක්ද පාර්ලිමේන්තුවට ඉදිරිපත් කිරීමට එහිදී වැඩිදුරටත් එකගත්වය පළවිය.

කම්කරු කටයුතු පිළිබඳ අමාත්‍යාංශයීය උපදේශක කාරක සභාව  කම්කරු අමාත්‍ය නිමල් සිරිපාල ද සිල්වා මහතාගේ ප්‍රධානත්වයෙන් ඊයේ  (04) රැස්විය. මෙම කාරණාවලට එකඟත්වය පළවී ඇත්තේ එම රැස්වීමේදීය.

තවද 1956 අංක 47 දරන ස්ත්‍රීන්, තරුණ අය සහ ළමයින් සේවයේ යෙදවීමේ පනත යටතේ ගැසට් කර ඇති උපද්‍රවකාරී රැකියා ලැයිස්තු නියෝග සංශෝධනය පාර්ලිමේන්තුවට ඉදිරිපත්කිරීම සම්බන්ධයෙන්  කාරක සභාව දැනුවත් කිරීමද මෙහිදී සිදුවිය.

මෙම කාරක සභා රැස්වීමට  රාජ්‍ය අමාත්‍ය ප්‍රියංකර ජයරත්න , පාර්ලිමේන්තු මන්ත්‍රීවරුන්වන  ඩබ්ලිව් ඩී ජේ  සෙනෙවිරත්න සහ ගෙවිඳු කුමාරතුංග යන මහත්වරුද සහභාගී වූහ.