(නිමල කොඩිතුවක්කු)
 
මැතිවරණ ඉලක්ක කරමින් කටයුතු කරනවා වෙනුවට වත්මන් ආණ්ඩුවේ ධූර කාලය අවසන් වන තෙක්ම රටත් ජනතාවත් වෙනුවෙන් සිදුකළ හැකි සියල්ල ඉටු කරන බව විද්‍යා තාක්ෂණ හා පර්යේෂණ කැබිනට් නොවන අමාත්‍ය සුජීව සේනසිංහ  මහතා කොළඹ දී පැවසීය.                                         

ඇතැම් පිරිස් මැතිවරණ ඉලක්ක කරමින් ක්‍රියා කරමින් සිටියත්  රට වෙනුවෙන් සිදුකළ කිසිවක් නැතැයිද අමාත්‍යවරයා සඳහන් කළේ්ය.                                      

රජයේ ප්‍රවෘත්ති දෙපාර්තමේන්තු ශ්‍රවණාගාරයේ අද (17) පැවති මාධ්‍ය හමුවකදී  ඔහු මේ බව පැවැසීය.                       
එහි දී වැඩිදුරටත් අදහස් දැක්වූ විද්‍යා තාක්ෂණ හා පර්යේෂණ කැබිනට් නොවන අමාත්‍ය සුජීව සේනසිංහ  මහතා මෙසේ ද කීවේය.       

‘‘විද්‍යාව, තාක්ෂණය සහ පර්යේෂණ කියන මේ  අමාත්‍යාංශය  දියුණු රටක නම් ප්‍රධාන අමාත්‍යාංශ තුනෙන් එකක් බවට පත්වෙනවා.  මෙතන තමයි රටේ අනාගතය රැඳී තිබෙන්නේ.                       

අමාත්‍යංශයක් විදියට අපි ජනතාව බලාපොරොත්තු වන ලස්සන රට බිහිකිරීමට කැපවී ක්‍රියා කරනවා. ඒ වෙනුවෙන් අපි මේ වනවිට විශාල පියවර රැසක් ගෙන තිබෙනවා.                                   

පාස්කු ඉරිදා ප්‍රහාරයෙන් රටේ ඉදිරි ගමනට විශාල හානියක් සිදුවුණා. අපි දැන් ඒ ත්‍රස්තවාදය සම්පූර්ණයෙන්ම මර්දනය කරමින් රට යථා තත්වයට පත්කරමින්  තිබෙනවා.  පාස්කු ඉරිදා ප්‍රහාරයෙන් පසු වාර්තා ගත ලෙස ආර්ථික, සංවර්ධන  අංශයෙන් රට ඉදිරියට ගෙනවිත් තිබෙනවා.                                  

නැවතත් වාර්තාගත ලෙස සංචාරකයන් දිවයිනට පැමිණෙමින් සිටිනවා. මෙවැනි ත්‍රස්තවාදි ප්‍රහාරයකින් පසු ඉතා ඉක්මණින්ම නැවත සන තත්වයට පත්වූ එකම රට බවට අද අපේ රට පත්ව තිබෙනවා.

අපේ අමාත්‍යංශය ඇතුළු සියලුම අමාත්‍යංශ ඒ වෙනුවෙන් විශාල වැඩපිළිවෙළක් ක්‍රියා කරගෙන යනවා. එහි ප්‍රතිඵල අද වනවිට අපේ ජනතාවට ලැබෙමින් පවතිනවා.

අපේ රජය කිසි වැඩක් නැහැ කියලා විපක්ෂය ඇතුළු පිරිස් අද චෝදනා කරනවා.  අපි මේ වසර  හතරහමාරක කාලය තුළ විශාල වැඩකොටසක් කරලා තියෙනවා. ඉදිරි කාලයත්  සැලසුම් සහගත වැඩපිළිවෙළක් ක්‍රියාත්මක කිරීමට අපේක්ෂා කරලා තියෙනවා" යැයි ඒ මහතා පැවසීය.