(නිමල කොඩිතුවක්කු)

මැතිවරණ කොමිසමට ඇඟිලි ගසමින් මැතිවරණ සියල්ලම කල් දැමූ ආණ්ඩුව මහජන උපයෝගීතා කොමිසමේ සභාපතිවරයාව ඉවත් කර ස්වාධීන කොමිෂන් සභා අකර්මණ්‍ය කරමින් ප්‍රජාතන්ත්‍ර විරෝධි දූෂිත වැඩපිළිවලක නිරත වන බව පාර්ලිමේන්තු මන්ත්‍රී අශෝක් අබේසිංහ මහතා කොළඹ දී ප්‍රකාශ කළේය.

පොහොට්ටු ආණ්ඩුව විසිවන ව්‍යවස්ථා සංශෝධනයෙන් ස්වාධීන කොමිෂන් සභා අකර්මණ්‍ය කර ගෙන ගිය දූෂිත වැඩපිළිවෙළ මේ ආණ්ඩුව ඒ ආකාරයෙන්ම කරගෙන යන බවත් මන්ත්‍රීවරයා සඳහන් කළේය.

මහජන උපයෝගිතා කොමිසමේ සභාපති ජනක රත්නායක මහතා ඉවත් කිරීමේ යෝජනාවට පක්ෂව ඡන්දේ ලබා දුන්නේ ජනතාව තව තවත් පීඩාවට පත් කරමින් විදුලි බිල රජයට අවශ්‍ය ලෙස වැඩි කිරීමට කැමති පිරිස පමණක් බවද කොළඹ මාක්ස් ප්‍රනාන්දු මාවතේ විපක්ෂනායක කාර්යාලයේ පැවති මාධ්‍ය හමුවකට එක්වෙමින් ඔහු පැවසීය.

පොදුජන පෙරමුණේ දූෂිත මන්ත්‍රීවරුන්ගේ ඡන්දයෙන් බලයට පත්වූ ජන වරමක් නොමැති ජනාධිපතිවරයා පොහොට්ටුවේ අවශ්‍යතාවයන් ඉටු කරමින් යන බව මේ මගින් වඩාත් තහවුරු වූ බවත් අබේසිංහ මහතා කීවේය.

ආණ්ඩුවේ ප්‍රජාතන්ත්‍රවිරෝධී දූෂිත වැඩපිළිවල පරාජයට පත් කිරීමට ඉදිරියේදී විපක්ෂයේ පක්ෂ සමග තවදුරටත් ශක්තිමත්ව මුහුණ දෙන බවත් මන්ත්‍රීවරයා තවදුරටත් පැවසීය.