(අංජුල මහික වීරරත්න)

පාරම්පරික වෛද්‍ය ක්‍රමයට හානි වන කිසිවක් ආයුර්වේද පනත් කෙටුම්පතේ නැතැයි  දේශීය වෛද්‍ය රාජ්‍ය අමාත්‍ය නීතීඥ සිසිර ජයකොඩි මහතා පැවසීය.

 වසර දහස් ගණනක් පැරණි උසස් චිකිත්සක ක්‍රමයක් වන පාරම්පරික වෛද්‍ය ක්‍රමයට හානිවන කිසිවක් කරන්නට ආණ්ඩුව සූදානම්  නැතැයිද ජයකොඩි මහතා කීය.

ආයුර්වේද පනත් කෙටුම්පත  කඩිනමින් කළ සංශෝධනයක් නොවන බවත් දැනට වර්ෂ එකහමාරක සිට දීර්ඝ පුළුල් සාකච්ඡාවක් කර නීතිපති දෙපාර්තමේන්තුවේ අනුමැතිය සහිතව පාර්ලිමේන්තුවට ඉදිරිපත් කළ බවත් දේශීය වෛද්‍ය රාජ්‍ය අමාත්‍යවරයා  කීවේය.

 රජයේ ප්‍රවෘත්ති දෙපාර්තමේන්තුවේ අද (6) පැවති ආයුර්වේද පනත පිළිබඳ දැනුවත් කිරීමේ මාධ්‍ය හමුව අමතමින් රාජ්‍ය අමාත්‍ය සිසිර ජයකොඩි  මහතා මේ බව සඳහන් කළේය.

ආයුර්වේද පනත 1961 අංක 31 යටතේ ස්ථාපිත දැනට වර්ෂ 62 කට පෙර පාර්ලිමේන්තුවේ අනුමත කළ පනතක් බවද මෙය දීර්ඝ කාලයක් තිස්සේ ආයුර්වේද වෛද්‍ය ක්ෂේත්‍රයේ  සහ සමස්ථ දේශීය වෛද්‍ය ක්‍රම පිළිබඳව සංවාදයට ලක් කරමින්  අලුත් පරිවර්තනීය වෙනස්කම් පිළිබඳව දීර්ඝ සාකච්ඡාවක් සිදුකළ බවද රාජ්‍ය  අමාත්‍යවරයා මෙහිදී අවධාරණය කළේය.