බස්නාහිර පළාත නියෝජනය කළ, හිටපු ඇමැතිවරයකු අනුරාධපුරයේ අටමස්ථානය වඳින්නට සිය බිරිඳ සමඟ පිටත්ව ගියේ විවාහ සංවත්සරය වෙනුවෙනි.

ඇමති කාලයේද වැඩි සද්දයක් බද්දයක් නැති ඔහුම සිය වාහනය පදවාගෙන ගියේය.

කුරුණෑගල පැත්තේ නිස්කලංක තැනක හෝටලයකට දහවල් කෑම සඳහා මෙම දෙදෙනාම ගොඩ වූහ.

කෑම බෙදාගත් හිටපු ඇමැතිවරයා සිය බිරිඳ සමග අසල මේසයක වාඩි වී කෑම ගනිමින් සිටියදී සුදු අත්කොට කමිසයකින් සැරසුණු තරුණයකු පැමිණ ඔහුටත් බිරිඳටත් වෙනත් මේසයකට යන ලෙස ඉල්ලීමක් කළේ ඒ මේසය විශේෂිත පුද්ගලයකුට වෙන් කර ඇති බව සඳහන් කරමිනි." තාම එහෙම කෙනෙක් ආවෙ නෑනෙ .අපි ආපුවම යන්නම්" හිටපු ඇමතිතුමා වැඩිය සද්දයක් නැතිව කීවේය. එහෙත් හිටපු ඇමතිවරයා ඒ අසල සිටීම ඉල්ලීම කළ පුද්ගලයාට ගැටලුවක් විය." ඔබතුමා අර මේසෙට යන්න. ඒ විශේෂ කෙනා තව ටිකකින් එනවා" ඔහු කීවේය

" අපි කාටවත් කරදරයක් වෙන්න ඕන නෑ ,එහා මෙිසෙට ගිහින් කමු "හිටපු ඇමතිවරයාගේ බිරිඳ යෝජනා කළේ ළග සිටි පුද්ගලයාගෙන් බේරෙන්නට බැරිම තැනය. ටික වේලාවකින් අර කී විශේෂිත පුද්ගලයා පැමිණියේය. ඔහු රජරට පළාත නියෝජනය කරන රාජ්‍ය ඇමතිවරයෙකි. කෑම බෙදා ගෙන ඔහු අසුන් ගත්තේ වෙන් කළ මේසයේ නොව වෙනත් මේසයක ය .හිටපු ඇමතිවරයා ඔහු ද හොඳින් හඳුනන්නකි

කෑම ගැනීමෙන් පසු ව ,හිටපු ඇමතිවරයා රාජ්‍ය ඇමතිවරයා ළඟට ගියේ ඒ හිතවත්කම නිසාය . ඔහු සමග කතාබහ කරමින් සිටියදී ළඟ සිටි ඔහුගේ ආරක්ෂකයකු පෙන්වා උපදෙසක් දෙන්නට ද ඔහු අමතක නොකළේය." ඇමැතිතුමා මේ ගොල්ලොත් එක්ක නම් ඉස්සරහට යන්නේ ඔබතුමාට වැඩි දුරක් යන්න හම්බවෙන්නෙ නෑ " සියල්ල පවසා හිටපු ඇමැතිවරයා පිටව ගියේ සිය මිතුරාට උපදෙසක් ද දෙමිනි.

(අගස්ති)