(ප්‍රදීප් කුමාර කුලරත්න)

මහරගම හයිලෙවල් මාර්ගයේ ඉන්ධන පිරවුම් හලක පොම්පකරුගේ ගෙලට තියුණු ආයුධයක් තබා බියගන්වා , ඔහු සන්තකයේ තිබූ රුපියල් හතළිස් පන්දහසක මුදලක් කොල්ලකා පළාගිය , පුද්ගලයින් දෙදෙනෙකු දින 28 කට  පසුව අත්අඩංගුවට ගත් බව බස්නාහිර -දකුණ අපරාධ කොට්ඨාසය පවසයි .

මෙසේ අත්අඩංගුවට ගෙන ඇත්තේ , මත්තෙගොඩ "කට්ටා " සහ තවත් පුද්ගලයකු බව පොලිසිය කියයි .

මෙම පුද්ගලයින් දෙදෙනා  ඉකුත්පසුගිය  මස  29 දා අලුයම 02:45 ට පමණ , ඉන්ධන ලබා ගැනීමේ මුවාවෙන් යතුරු පැදියකින් පැමිණ , මෙම කොල්ලය සිදු කර තිබුණි .

එහිදී සැකකරුවන් දෙදෙනා මුදල් කොල්ල කන මුවාවෙන් අවස්ථා තුනකදී මෙම ස්ථානයට පැමිණ තිබූ අතර , අවසන් අවස්ථාවේදී , ඉන්ධන ලබා ගෙන ඒ සඳහා රුපියල් 5000 ක මුදලක් පොම්ප කරුට ලබාදී තිබේ.

පසුව එහි ඉතිරි මුදල් ලබාදීම සඳහා පොම්පකරු ,තම මුදල් බහා තිබූ ලාච්චුව විවර කළ අවස්ථාවේදී , යතුරුපැදියෙන් පැමිණි පසු පැදිකරු , පොම්පකරුගේ ගෙළට තියුණු ආයුධයක් තබා බිය ගන්වා ඇති අතර එම අවස්ථාවේදී පැදිකරු ලාච්චුවේ තිබූ රුපියල් 45,000 ක මුදලක් මෙසේ කොල්ලකා තිබුණි .

එම අවස්ථාවේ දී  ඒ බව දුටු යාබද පොම්පකරු , පොල්ලක් රැගෙන එම ස්ථානයට පැමිණෙනවාත් සමගම , පසු පැදිකරු පලා යද්දී , යතුරු පැදිය පණගැන්වීමට නොහැකි වූ පැදිකරු ද , යතුරුපැදිය එම ස්ථානය අතහැර දමා , කොල්ල කන ලද රුපියල් 45000 ක මුදල් ද රැගෙන  පළාගොස් තිබූ බව පොලිසිය කියයි.

පසුව මේ පිළිබඳව ලද පැමිණිල්ලකට අනුව පොලිස් නිලධාරීන්  සිද්ධිය වූ ස්ථානයට පැමිණ  පරීක්ෂා කිරීමේදී , සැකකරුවන්ගේ බවට සැක කරන මුදල් පසුම්බියක් , හමුවූ අතර , එහි තිබූ හැඳුනුම්පතක් ඔස්සේ විමර්ශන සිදු කොට ,  සැකකරුවන් දෙදෙනා , කටුනායක රද්දොළුගම ප්‍රදේශයේ සැඟවී සිටියදී ,මෙසේ අත්අඩංගුවට ගත් බව පැවසේ .

කොල්ලකෑමට පැමිණි යතුරුපැදිය එම ස්ථානයේදීම තිබී පොලිස් භාරයට ගෙන තිබු අතර එම යතුරු පැදිය ,බොරලස්ගමුව ප්‍රදේශයේ නිවසක් ඉදිරිපිට නවතා තිබියදී , සැකකරුවන් දෙදෙනා එදින උදෑසන සොරා ගෙන ආ එකක් බවට තොරතුරු අනාවරණය වූ බවද පොලිසිය පවසයි.

සැකකරුවන් දෙදෙනා කොල්ලකෑමෙන් පසුව සැඟව සිට ඉකුත් 17 දා නැවත මත්තේගොඩ ප්‍රදේශයට පැමිණ , සල්ගස් මාවත ප්‍රදේශය හරහා මහ මඟ ගමන් කරමින් සිටි කාන්තාවකගේ ගෙල බැදි පවුම් දෙකක් වටිනා රන් මාලයක්ද  කොල්ල කා පලා ගොස් තිබුණි .

ජාවාරමේ ප්‍රධාන සැකකරු මීට වසර තුනකට පෙර කහතුඩුව පොලිස් වසමේ මහ මඟ නමග නවතා තිබු යතුරු පැදි සොරාගෙන , එහි කෑලි ගලවා , පල්දෝරු පද්ධතියක සගවා , කොටස් අලෙවි කිරීමේ ජාවාරමක නිරත වුවකු බවත් කොල්ලකෑම් රැසක් සම්බන්ධයෙන් මත්තෙගොඩ පොලිසියට අවශ්‍යව සිටි සැකකරුවෙකු බවත් පොලිසිය කියයි.

අධික ලෙස හෙරොයින් සහ අයිස් පානයට ඇබ්බැහිවූ ,සැකකරුවන් දෙදෙනා , සොරකම් සහ  හෙරොයින් සම්බන්ධයෙන් අවස්ථා කිහිපයකදී බන්ධනාගාරගතව සිට ඇප මත නිදහස්ව ආ දෙදෙනකු  බවද පැවසේ.

අත්අඩංගුවට ගත්  (22 - 28) වයසේ පසුවන සැකකරුවන් දෙදෙනා අද (28) දා නුගේගොඩ අධිකරණයට ඉදිරිපත් කිරීමට නියමිතව තිබුණි .