(විමුක්ති එස් රුද්‍රිගු)

හිස්බුල්ලා සංවිධානය සහ ඊශ්‍රායලය අතර මාස 14 කට ආසන්න කාලයක් පැවැති ගැටුම් අවසන් කරමින් දෙපාර්ශවය අතර එළැඹි සටන් විරාම ගිවිසුම ඊශ්‍රායල වේලාවෙන් අද(27) අලුයම 4 ට බලාත්මක විය.

සටන් විරාම ගිවිසුම ඊශ්‍රායලය, ප්‍රංශය සහ ඇමෙරිකාවේ විසින් ඊයේ(26) නිවේදනය කරනු ලැබුවේය. සටන් විරාම ගිවිසුමට ඊශ්‍රායල ජාතික ආරක්ෂක කැබිනට් මණ්ඩලයේ අමාත්‍යවරුන් 10 කගේ අනුමැතිය හිමිවුණු අතර එක් අමාත්‍යවරයකු ඊට විරෝධය පළ කළේය.

සටන් විරාම ගිවිසුමට දින 60 ක සංක්‍රාන්ති කාලයක් ඇතුළත්ව ඇත. එම කාලයේදී ඊශ්‍රායල හමුදාව දකුණු ලෙබනනයෙන් ඉවත් වනු ඇති අතර ලෙබනන හමුදාව 5000 ක පමණ භට පිරිසක් ඊශ්‍රායල දේශ සීමාවේ ස්ථාන ගත වෙමින් මුර පොළවල් 33 ක් පිහිටුවීමට නියමිතය.

එම කාලය තුළදී හිස්බුල්ලා සටන්කාමීන් දකුණු ලෙබනනයෙන් ඉවත් වී හිස්බුල්ලා සංවිධානයේ මුරපොළවල්ද දකුණු ලෙබනනයෙන් ඉවත් කරගනු ඇත. කෙසේ නමුත් සටන් විරාම ගිවිසුමත් සමඟ ඇමෙරිකාවේ තවත් ලිපියක්ද නිකුත් කර ඇති අතර හිස්බුල්ලා සංවිධානය සටන් විරාම ගිවිසුම උල්ලංඝනය කරනු ලැබුවහොත් එයට ප්‍රතිචාර දැක්වීමට ඊශ්‍රායලයට සම්පූර්ණ අයිතිය තිබෙන බවට එහි සඳහන්ව තිබිණි.

අවසන් ගිවිසුම දැක නැති වුවත් සටන් විරාම ගිවිසුමට එකඟ වන බවත් ඊශ්‍රායලය ගිවිසුමට අත්සන් තැබූ එය සමාලෝචනය කිරීමෙන් පසු ලෙබනන බලධාරීන් එකඟ වූ සහ හිස්බුල්ලා සංවිධානය ප්‍රකාශකල කොන්දේසි අතර ගැලපීමක් තිබේදැයි විමසා බලන බවත් හිස්බුල්ලා දේශපාලන මණ්ඩලයේ උප සභාපති මහමුද් ඛමාති ප්‍රකාශ කළේය.