(සුජිත් හේවාජුලිගේ සහ අංජුල මහික වීරරත්න)

මහජන උපයෝගීතා කොමිෂන් සභාවේ පද්ධතිය ඩිජිටල්කරණය කිරීමට  එහි ප්‍රධානීන් දක්වන අඩු සැලකිල්ල පිළිබඳව  ජාතික ආර්ථික හා භෞතික සැළසුම් පිළිබඳ ආංශික අධීක්ෂණ පාර්ලිමේන්තු කාරක සභාවේ අප්‍රසාදය  පළ කර ඇත.

පසුගිය  2020 වසරේ ශ්‍රී ලංකා මහජන උපයෝගිතා කොමිෂන් සභාවේ වාර්ෂික වාර්තාව එම  කාරක සභාව සැලකිල්ලට ගත් අවස්ථාවේදී මේ පිළිබඳ  කරුණු අනාවරණය විය.

එම කාරක සභාව එහි සභාපති
මන්ත්‍රී  මහින්දානන්ද අලුත්ගමගේ මහතාගේ ප්‍රධානත්වයෙන් පාර්ලිමේන්තු සංකීර්ණයේදී පසුගිය 10 වැනිදා රැස්විය.

පද්ධතිය ඩිජිටල්කරණයට ලක්  කිරීම සඳහා ක්‍රියා කිරීමේදී මහජන උපයෝගිතා කොමිෂන් සභාව (PUCSL) සහ ලංකා විදුලිබල මණ්ඩලය (CEB) ඒ සඳහා දක්වන අඩු සැලකිල්ල  පිළිබඳව කාරක සභාව ප්‍රශ්න කළේය.

පාර්ලිමේන්තුව විසින් දෙන ලද නියෝග ක්‍රියාත්මක කිරීමට අපොහොසත්වීම උත්තරීතර සභාවට  අගෞරවයක් බව පැවසූ කාරක සභාව පද්ධතිය භාවිත කිරීමේදී  මානව මැදිහත්වීම් අවම කළ යුතු බව ප්‍රකාශ කළේය.

ඩිජිටල්කරණයට ලක් කිරීම පද්ධතියේ  එක් කණ්ඩායමක්  හේතුවෙන් අභියෝගකට ලක්ව ඇති බවත්  මෙයාකාරයෙන්  එක් කණ්ඩායමකට ඉඩ දීමෙන් සිදුවන්නේ පාරිභෝගිකයා මත බර පැටවීම පමණක් බවත් කාරක සභාව පෙන්වා දෙයි.

මෙම තත්ත්වය නිවැරදි කිරීම සඳහා මහජන උපයෝගිතා කොමිසමේ නිලධාරීන් මීට වඩා දැඩිව  ක්‍රියා මාර්ග  ගත යුතු බවද    කාරක සභාව අවධාරණය කර ඇත.

මේ රැස්වීමට පාර්ලිමේන්තු මන්ත්‍රීවරුන්  වන  ගුණතිලක රාජපක්ෂ,  මධුර විතානගේ, සහ  එම ආයතන දෙකේ ප්‍රධානීහු සහභාගි වූහ.