(යොහාන් භාසුර)

දුම්රිය ස්ථානාධිපතිවරුවන්ගේ උසස්වීම් දිගින් දිගටම ප්‍රමාද කිරීමට විරෝධය දක්වමින් මෙම මස සිට ‘මාසික ආදායම් වාර්තා’ යොමු නොකිරීමේ වෘත්තීය ක්‍රියාමාර්ගයකට එළඹීමට තීරණය කළ බව ශ්‍රී ලංකා දුම්රිය ස්ථානධිපති සංගමයේ ප්‍රධාන ලේකම් කසුන් චාමර මහතා ‘ලංකාදීප’යට පැවසීය.

දුම්රිය ස්ථානාධිපතිවරුන් 500 ත් 700 ත් අතර සංඛ්‍යාවකගේ උසස්වීම් 2011 වසරේ සිට දිගින් දිගටම දුම්රිය දෙපාර්තමේන්තුව ප්‍රමාද කරමින් සිටින බව කී කසුන් චාමර මහතා පුරප්පාඩුව පවතින ප්‍රධාන ස්ථානාධිපතිවරු තනතුරු 60 සඳහා ජනවාරි මස සම්මුඛ පරීක්‍ෂණ පැවැත්වුවද මේ දක්වා එම පත්වීම් ලබාදී නොමැති වීම සහ තුන්වැනි ශ්‍රේණියේ ස්ථානාධිපතිවරු 600 කට අධික සංඛ්‍යාවක් සිටිය ද දෙවැනි ශ්‍රේණියේ එකඳු ස්ථානාධිපතිවරු නොමැති බවත් සඳහන් කළේය.

මෙම වෘත්තීය ක්‍රියාමාර්ගයත් සමඟ මාසික ආදායම් වාර්තා මහා භාණ්ඩාගාරයට යොමු නොවීමෙන් දුම්රිය දෙපාර්තමේන්තුවේ දෛනික සහ මාසික ආදායම් ගණනය කිරීම මෙන්ම ඉදිරි වර්ෂයේ රජයේ ගිණුම් තුළනය කිරීමට නොහැකි වන බවත් මෙම ගැටලුව නිරාකරණය කරන තුරු අඛණ්ඩව මාසික ආදායම් වාර්තා දෙපාර්තමේන්තුවට යොමු නොකරන බවත් කසුන් චාමර මහතා කීය.

මෙම වෘත්තීය ක්‍රියාමාර්ගයෙන් ජනතාවට කිසිඳු හිරිහැරයක් හෝ ප්‍රමාදයක් නොවන බව සඳහන් කළ ඒ මහතා දුම්රිය ධාවනය ආරම්භ කළ වාහාම කිසිඳු ගැටලුවකින් තොරව සේවය ලැබෙන බවත් පැවසීය.