(කේ බුද්ධික කුමාරසිරි)

විදේශ ගතව සිට මෙරට කුඩු ජාවාරම මෙහෙයවන රත්මලානෙ කුඩු අංජු නමැත්තාගේ මුදල් පරිපාලනය සහ මත්කුඩු බෙදා හැරීමේ ජාලය මෙහෙය වූ බව කියන පුද්ගලයකු අපරාධ පරීක්ෂණ දෙපාර්තුමේන්තුවේ නීති විරෝධී වත්කම් විමර්ශනය අංශය මගින් සැකපිට අත් අඩංගුවට ගෙන අධිකරණය වෙත ඉදිරිපත් කිරීමෙන් පසු අප්‍රියෙල් මස 06 වන දින දක්වා රිමාන්ඩ් බාරයේ තබන්නැයි කඩුවෙල මහේස්ත්‍රාත් චාණිමා විජේබණ්ඩාර මහත්මිය අද (31) දින නියෝග කළාය.

මෙලෙස බන්ධනාගාර ගත කරන ලද්දේ තිස්සමහාරාම ප්‍රදේශයේ පදිංචිකරුවකු වන 46 හැවිරිදි විදේශයක ගණකාධිකාරිවරයකු ලෙස කටයුතු කල බව කියන පුද්ගලයෙකි.

සැකකරු කාලයක සිට මෙලෙස කුඩු අංජු නමැත්තාගේ මත්ද්‍රව්‍ය ජාලය සම්බන්ධීකරණ සහ මුදල් පාලනය සිදු කර ඇති බවත් පසුගිය මාස කිහිපය තුළ රුපියල් ලක්ෂ හාරසියකට අධික මුදලක් මෙරට සිට විදේශ රටකට යවා ඇති බවද මෙහිදී අපරාධ පරීක්ෂණ දෙපාර්තුමේන්තුවේ නීති විරෝධී වත්කම් විමර්ශනය ඒකකය මගින් අධිකරණය වෙත කරුණු වාර්තා කරන ලදී.

ඒ අනුව මුදල් විශුද්ධිකරණ පනත යටතේ සැකකරු අත් අඩංගුවට ගෙන අධිකරණය වෙත ඉදිරිපත් කර තිබුණි.