(අජන්ත රත්නායක)

කොවිඩ් ආසාදිතයන් 29 දෙනකු හඳුනාගැනීමෙන් කුරුණෑගල ගනේවත්ත සෞඛ්‍ය වෛද්‍ය නිලධාරී කොට්ඨාශයට අයත් තිත්තවැල්ගාල ගම්මානය අද ( 18)  සිට හුදෙකලා කිරීමට සෞඛ්‍ය අංශ විසින් පියවර ගනු ලැබීය.

තිත්තවැල්ගාල ගම්මානයට ප්‍රවේශ වන සහ ඉන් පිට වන මාර්ග සියල්ලම පොලිස් මාර්ග බාධක යොදා වසා දමා ඇති අතර පවුල් 540 කට වැඩි ප්‍රමාණයකට අයත් පිරිසක් මෙම ගම්මානය තුළ නිරෝධායනයට ලක්කර ඇති බව සෞඛ්‍ය අංශ පවසයි.

කුඹුක්ගැටේ මහජන සෞඛ්‍ය පරීක්ෂක සිසිර බණ්ඩාර බස්නායක මහතා ප්‍රදේශයේ තත්වය පිළිබඳව ලංකාදීපයට මෙලෙස අදහස් දැක්වීය.

" තිත්තවැල්ගාල ප්‍රදේශයෙන් කොවිඩ් රෝගීන් විසි නව දෙනකු සහ ඊට පරිබාහිරව තවත් රෝගීන් හතර දෙනෙකු දැනට හඳුනාගෙන තිබෙනවා.මෙම ප්‍රදේශයේ පළමු රෝගියා ලෙස ව්‍යාපාරික මහතෙක් අපි හදුනා ගත්තා. ඔහුගේ ආශ්‍රිතයින් හැත්තෑ දෙදෙනෙකු පමණ පීසීආර් පරීක්ෂාවට ලක් කිරීමේදී ඒ අතර සිටි විසි නව දෙනකු කොවිඩ් ආසාදිතයින් බව තහවුරු වුණා. එය ප්‍රතිශතයක් ලෙස සියයට හතළිස් පහක් පමණ වන නිසා අපට තිත්තවැල්ගාල ප්‍රදේශයට සංචාරණ සීමාවන් පනවන්න සිද්ධ වුණා.

ඒ වගේම තිත්තවැල්ගාල ප්‍රදේශවාසීන්ගේ වෙනත් ප්‍රදේශවල තිබුණු සම්බන්ධතාත් හඳුනාගෙන ඒ අයත් ස්වයං නිරෝධායනයට යොමුකර තිබෙනවා . හුදෙකලා කළ ප්‍රදේශයේ අයට අවශ්‍ය ආහාර, ඖෂධ ආදී සියලුම දේ පිළිබඳව සොයා බලමින් පහසුකම් සලසනවා. නමුත් ලොකු ගැටලුවකට තිබෙන්නේ සෞඛ්‍ය වෛද්‍ය නිලධාරීතුමා සහ මහජන සෞඛ්‍ය පරීක්ෂකවරුන් හතර දෙනෙකුට පමණයි මේ කාර්යයේ නිරතවෙන්න වෙලා තිබෙන්නේ.

නමුත් අවම පහසුකම් මැද වුනත් අපේ සේවාව සලසන්න අපි උපරිම උත්සහ කරනවා. ලබන විසි වැනිදා මේ ගම්මානයේ සියලුම දෙනාම පීසීආර් පරීක්ෂාවට ලක් කරනවා. අපි බලාපොරොත්තු වෙනවා තවත් ආසාදිතයින් දෙසීයක්වත් මේ ගම්මානයේ ඇති කියලා. එම පරීක්ෂණවලදී ලැබෙන ප්‍රතිඵල අනුව මේ ගම්මානයෙන් සංචරණ සීමාවන් ඉවත් කිරීම පිළිබඳව සලකා බලනවා." යැයි හෙතෙම පැවසීය.