(පුෂ්පකුමාර ජයරත්න)

සෞඛ්‍යාරක්ෂිත උපදෙස් කඩවන ආකාරයට  කුරුණෑගල දිස්ත්‍රික් මෝටර් රථ ප්‍රවාහන කාර්යාලයේදී පවත්වමින් තිබූ රථවාහන ලිඛිත පරීක්ෂණයක් කුරුණෑගල නගරාධිපති තුෂාර සංජීව විතාරණ මහතාගේ මැදිහත් වීමෙන් අත්හිටවනු ලැබීය.

කිසියම් පුද්ගලයකු කරන ලද පැමිණිල්ලකට අනුව කුරුණෑගල දිස්ත්‍රික් ලේකම් කාර්යාලයට යාබදව පිහිටි කුරුණෑගල දිස්ත්‍රික් මෝටර් රථ ප්‍රවාහන දෙපාර්තමේන්තුවේ කාර්යාලය වෙත ගිය නගරාධිපතිවරයා පැමිණිල්ලට අදාළ කරුණු සොයා බලා එම අවස්ථාවේදීම පැවැත්වෙමින් තිබූ විභාගය අත්හිටුවන ලෙස කුරුණෑගල දිස්ත්‍රික් මෝටර් රථ ප්‍රවාහන සහකාර කොමසාරිස් චන්දිම බණ්ඩාර මහතාට දැනුම් දුන්නේය.

පනවා ඇති සෞඛ්‍යාරක්ෂිත උපදෙස් සම්පූර්ණයෙන්ම උල්ලංඝනය වන ආකාරයට  විශාල අපේක්ෂකයන් පිරිසක් යොදවා ලිඛිත විභාගය පවත්වමින් සිටි බව නගරාධිපති තුෂාර සංජීව විතාරණ මහතා "ලංකාදීපයට" පැවසීය.