(ෂේන් සෙනෙවිරත්න)

දකුණු කොරියාවේ රැකියා ලබාදෙන බව පවසා දිවයිනේ විවිධ ප්‍රදේශවල පුද්ගලයන්ගෙන් විදේශ ගමන් බලපත්‍ර 275 ක් එකතුකොට සන්තකයේ තබාගෙන සිටි පුද්ගලයෙක් විදේශ සේවා නියුක්ති කාර්යාංශයේ විමර්ශන නිලධාරීන් විසින් අත්අඩංගුවට ගනු ලැබීය.

මහනුවර ගැටඹේ දංගොල්ල පාරේ පවත්වාගෙන ගිය විදේශ රැකියා ආයතනයක් වටලා එම විදේශ ගමන් බලපත්‍ර තොගය සමග සැකකරු අත්අඩංගුවට ගෙන තිබේ .

අත්අඩංගුවට ගැනීම සිදු කළ විමර්ශන නිලධාරියකුගෙන් කළ විමසීමකදී ඔහු පවසා සිටියේ එම විදේශ රැකියා ආයතනයට වෙනත් රටවලට රැකියා සඳහා ශ්‍රමිකයන් යැවීමට බලපත්‍ර තිබුණත් දකුණු කොරියාවට ශ්‍රමිකයන් යැවීම සඳහා විදේශ සේවා නියුක්ති කාර්යංශයේ අවසර නොතිබූ බවයි .

මෙම මෙහෙයුම සඳහා විදේශ සේවා නියුක්ති කාර්යාංශයේ විමර්ශන නිලධාරීන් වන සරත් විමලවීර, වසන්ත ඒකනායක, මධුෂාන් විජේවර්ධන, සහ විමර්ශන නිලධාරිනියන් වන නදිකා චන්දිමාලි සහ ගයේෂා සුභාෂිනි යන මහත්ම මහත්මීහු සහභාගී වූහ .