(කුෂාන් ජයවර්ධන)

ඉවුරු ඛාදනයත් සමග පුබ්බෝගම කිරළව පාලම ගිලා බැසීමේ අවධානම  හේතුවෙන් එම පාලම මතින් සිදු කෙරෙන සියලු ගමනාගමන කටයුතු අද තාවකාලිකව අත් හිටුවීමට මාර්ග සංවර්ධන අධීකාරිය පියවර ගෙන තිබේ.

මාර්ග සංවර්ධන අධිකාරියේ මරදන්කඩවල විධායක ඉංජිනේරු කාර්යාලයේ නිලධාරීන් පැමිණ එම පාලමේ තත්ත්වය නිරීක්ෂණය කිරීමෙන් පසුව එම තීරණය ගෙන තිබේ.

දඹුළු ඔය ජලාශයේ සිට කලාවැව දක්වා ජලය රැගෙන යනු ලබන දඹුළු ඔය හරහා ඉදිකර ඇති මෙම කිරළව පාලම අසළ ඊයේ දිනයේ සිදුව තිබූ බරපතළ ඉවුරුඛාදනයක් හේතුවෙන් ගිලා බැසීමේ අවධානමකට ලක්ව තිබිණ.

කෙසේ වෙතත් මේ වනවිටද පවතින වර්ෂාවත් සමග උපරිම මට්ටමේ පවතින දඹුළු ඔය ජලාශයේ හදිසි වාන් දොරටුවලින් දඹුළු ඔය වෙත ජලය නිකුත් කෙරෙමින් පවතී.

පවතින වර්ෂාවත් සමග එම හදිසි වාන් දොරටු වසා දැමීමේ හැකියාවක් ද නොමැති බව ජලාශ කාර්යාලය කියයි.

ඒ අනුව පාලමේ පවතින අවධානම් තත්ත්වය සලකා ජීවිත හා දේපල ආරක්ෂාව වෙනුවෙන් මෙලෙස අද එම පාලම මතින් සිදු කෙරෙන සියලු ගමනා ගමන කටයුතු තාවකාලිකව අත්හිටවූ බව ගිරානේගම පොලිසිය කියයි.

මාර්ගය වසා දැමීම හේතුවෙන් මේ වනවිට පුබ්බෝගම සිට මඩාටුගම දක්වා වූ කිලෝමීටර් 04ක පමණ දුරක් රථවාහන ගමනා ගමනයට බාධා පැමිණ තිබේ.

මේ වනවිට ආඩියාගල දෙස සිට සිට මඩාටුගම මාර්ගයේ රථ වාහන ගමනා ගමනය පුබ්බෝගම දක්වා සීමා කිරීමට ඒ අනුව පොලිස් රථවාහන අංශය පියවර ගෙන තිබේ.

ඒ අනුව, ආඩියාගල සිට මඩාටුගම මාර්ගය ඔස්සේ මඩාටුගම, කැකිරාව හා දඹුල්ල වෙත ගමන් කළ රථවාහන මේ වන විට පුබ්බෝගම මංසන්ධියෙන් ජලාශ පාර ඔස්සේ දඹුල්ල දෙසට ධාවනය කරවීමට පොලිසිය පියවර ගෙන තිබේ.එබැවින් සිය ගමනාගමන කටයුතු වලදී එම මාර්ගය භාවිතා කරන්නේ නම් හැකිතාක් දුරට විකල්ප මාර්ග භාවිතා කරන ලෙසට ගිරානේගම පොලිසිය රියදුරන්ට දැනුම් දෙයි.