(තිලකරත්න දිසානායක)

කුලී පදනම මත වාහන ලබාදෙන ස්ථානයකින් වාහන ගෙන ඒවා කොටස් කර අලෙවි කිරීමේ ජාවාරමක නිරත සිටි කල්ලියක නායකයා සහ සගයකු අත් අඩංගුවට ගනු ලැබූ බව ගම්පහ කොට්ඨාස දූෂණ විමර්ශන අංශය සදහන් කරයි.

නිට්ටඹුව ප්‍රදේශයේ ගෙවත්තක වාහනයක් කොටස් කරමින් සිටින බවට ලද තොරතුරක් මත දූෂණ විමර්ශන අංශයේ නිලධාරීන්  අදාල ස්ථානය වටලන ලද අවස්ථාවේ රුපියල් ලක්ෂ 50 ක් පමණ වටිනා  මෝටර් රථයක් කොටස් කරමින් තිබියදී කල්ලි නායකයා සහ අනෙකා කොටු කර ගැනීමට හැකි වූ බව පොලීසිය පවසයි.

මෙම සැකකරුවන් නෙළුන්දෙනිය සහ නයිවල ප්‍රදේශයන්හි පදිංචි 38 වියෙහි පසුවන විවාහකයන් බවද පොලීසිය පවසන අතර ප්‍රධාන සැකකරු කලක් පුරා විද්‍යා දෙපාර්තුමේන්තුවෙහි කැනීම් අංශයේ සේවය කොට ඇති බව අනාවරණයවී යැයිද කියයි.

මොවුන් දිවයිනෙහි විවිධ ප්‍රදේශවල පුද්ගලයන්ට පොහොර ලබා දෙන බව පවසමින් මුදල් වංචා සිදු කළ බවට පැමිණිලි ලැබී ඇති බවද පොලීසිය පවසයි.

මොවුන්ගෙන් ප්‍රශ්ණ කිරීමේදී අනාවරණය කරගත් තොරතුරු වලට අනුව පසුගිය 2 වෙනිදින අනුරාධපුර ප්‍රදේශයෙන් රුපියල් 50,000 ක අත්තිකාරම් මුදලක් ගෙවා කුලී පදනම මත මෝටර් රථය ලබාගෙන ඒකල ප්‍රදේශයට රැගෙන විත් ජී.පී.එස් තාක්ෂණ උපකරණය ඉවත් කොට පසුව නිට්ටඹුවට රැගෙන ගොස් කොටස් කිරීම සිදු කළ බව අනාවරණය වී තිබේ.