(ආනන්ද ඉ ජයකොඩි)

රටතුළ නොසන්සුන්කාරී තත්වයක් හට ගත් දා රාත්‍රී කල්එළිය හිරිවල වාහන ගාල් කර තිබූ ව්‍යාපාරික ස්ථානයකට පහරදී රුපියල් ලක්ෂ තුන්සීයක අලාභයක් සිදු කොට ඇති බව කියන සිද්ධියක් සම්බන්ධව සැකකාර පාපන්දු ක්‍රීඩා පුහුණු උපදේශකවරයකු  17 වනදා දක්වා රිමාන්ඩ් භාරයේ රදවා තැබීමට අත්තනගල්ල වැඩ බලන මහේස්ත්‍රාත් ජයසේකර රණසිංහ මහතා නියෝග කළේය.

මීරිගම පදිංචි කේ ඒ දමිත් ලහිරු කන්නන්ගර නැමැත්තෙකු එසේ රිමාන්ඩ් කැරිණි.

කොළඹ ගාලු මුවදොර සහ අරලියගහ මැදුර ඉදිරිපිට නිර්පාක්ෂික විරොධතාකරුවන්ට පහර දීමේ සිද්ධිය වූ ඉකුත් 09 වනදා රාත්‍රී විශාල පිරිසක් හිරිවල වාහන ගාල් කර තිබූ ව්‍යාපාරික ස්ථානයකට කඩා වැදී පහරදී රුපියල් ලක්ෂ තුන්සීයක පමණ අලාභයක් සිදු කොට ඇති බව කියන සිද්ධියක් සම්බන්ධව පල්ලෙවෙල පොලීසිය පරීක්ෂණ පවත්වා සැකකාර පාපන්දු‍ ක්‍රීඩා පුහුණු උපදේශක වරයා අත් අඩංගුවට ගෙන තිබිණ.

සැකකරු අධිකරණයට ඉදිරිපත් කරමින් පල්ලෙවෙල පොලීසියේ නඩු මෙහෙයුම් අංශයේ පොලිස් කොස්තාපල් ජී.පී.ඒ කුමාර මහතා කරුණු දක්වමින් පසුගිය 09 වනදා රාත්‍රී පිරිසක් වාහන ගාල් කර තිබූ ස්ථානයට කඩා වැදී පහරදීම් සිදු කොට රුපියල් ලක්ෂ තුන්සීයක පමණ අලාභයක් සිදු කොට ඇති බව කියා සිටියේය.