(කුමාරී කංකානම්ගේ)

කල්පිටියේ  රජයේ ඉඩමකට බලෙන් ඇතුලු වූ  කිසියම් පිරිසක් විසින් එහි තිබූ පොල් පැළ සමූහයක් මුලින් උදුරා දමා කපා කොටා විනාශ කොට ඇතැ යි,කල්පිටිය ප්‍රාදේශීය ලේකම්වරයා කල්පිටිය පොලිස් ස්ථානයට පැමිණිල්ලක් කර තිබේ.

කල්පිටියේ වටිනා පුරා විද්‍යා ස්මාරකයන් වන කුවේණියගේ නැගණියක වූ අල්ලි රාණීයගෙ  මාලිගාව හා  ඓතිහාසික ගෙන්ගේ ජලාශයට යාබදව මෙම ඉඩම පිහිටා තිබේ.

කල්පිටිය ප්‍රාදේශීය ලේකම් ඩී.ඒ.පී.ධනන්සූරිය මහතාගෙන් විමසූ විට ඒ මහතා ප්‍රකාශකළේ,කිසියම් පිරිසක් මෙම රජයේ ඉඩම ක්‍රීඩා පිටියක් සදහා තමන්ට ලබාදෙන ලෙසට ඉල්ලීමක් කර ඇති බවයි.

එහෙත් එම ඉඩම කිසිවෙකුට හෝ මෙතෙක් පවරා දී නොමැති බවත්, එවැනි පසු බිමක යම් කිසි පිරිසක් රජයේ ඉඩමේ තිබූ පොල් පැල මෙසේ විනාශ කර තිබීම නිසා  පොලිසියේ පැමිණිල්ලක් දැමූ බවද ප්‍රාදේශිය ලේකම්වරයා කීවේය.

අප මේ පිළිබදව කල්පිටිය පොලිස් ස්ථානාධිපති පොලිස් පරීක්ෂක නිශාන්ත කුමාර මහතාගෙන් විමසූ විට ඒ මහතා පැවසුවේ එම පැමිණිල්ලට අදාලව විමර්ශණ අරඹා ඇති බව ය.