(ඩයනා උදයංගනී)

කොවිඩ් ආසාදනය වන ගැබිණි මවුවරුන් සංඛ්‍යාව ඉහළ යාම නිසා ඔවුන්ට ප්‍රතිකාර ලබාදීමට දැනට පවතින පහසුකම් ප්‍රමාණවත් නැතැයි ප්‍රසව හා නාරිවේද විශේෂඥ වෛද්‍යවරුන්ගේ සංගමයේ සභාපති විශේෂඥ වෛද්‍ය ප්‍රදීප් ද සිල්වා මහතා අද (6) පැවසීය.

ගැබිණි මවුවරුන්ට රෝගය වැළඳීමේ හා සංකූලතා මතුවීමේ වැඩි අවදානමක් ඇති බැවින් ඔවුන් වෙනුවෙන් දිස්ත්‍රික් මට්ටමින් ප්‍රතිකාර පහසුකම් ඉහළ නැංවිය යුතු බව ද සභාපතිවරයා සඳහන් කළේය.

පෙනහළු අකර්මන්‍ය වූවන් වෙනුවෙන් අවශ්‍ය වන එක්මෝ යන්ත්‍ර මේ වන විට මෙරට ඇත්තේ දෙකක් පමණක් බව කී විශේෂඥ වෛද්‍ය ප්‍රදීප් ද සිල්වා මහතා ගැබිණි මවුවරුන් වෙනුවෙන්ම වූ තවත් යන්ත්‍ර දෙකක පමණ අවශ්‍යතාවයක් තිබෙන බව ද කීවේය.

වෛද්‍යවරයා මේ බව පැවසුවේ කොළඹ 08, මොඩල්ෆාම් පාරේ පිහිටි ප්‍රසව හා නාරිවේද විශේෂඥ වෛද්‍යවරුන්ගේ විද්‍යායතනයේදී අද (6) පැවති මාධ්‍ය හමුවක් අමතමිනි.