(ලක්මි කුඩලිගම)

පවතින වැසි සහිත  කාලගුණ තත්ත්වය හේතුවෙන් කළුතර දිස්ත්‍රික්කයේ හදිසි ගංවතුර අවදානමක් මතු විය හැකි බව ආපද කළමනාකරණ  ඒකකය සහ ප්‍රාදේශීය  ලේකම්වරුන් ජනතාවට  අනතුරු  අගවති.

කළුතර දිස්ත්‍රික්කයේ ප්‍රදේශ කිහිපයක පහත් බිම් සහ අතුරු මාර්ග කීපයක්  ජලයෙන් යටව තිබෙන බව කළුතර  දිස්ත්‍රික්  ආපදා  කළමනාකරණ  ඒකකය අද (03) සවස කීවේය.

කුකුළේ ගඟ බලාගාරයේ වාන් දොරටු  දෙකක් විවෘත කර විදුලි උත්පාදනයේ දී පිට කරන ජල ධාරිතාවක් සමග තත්පරයට ඝන මීටර් 140ක  පමණ ජල ධාරිතාවක් කුඩා ගඟට මුදා හරින බවත් ඒ අනුව  බුලත්සිංහල  ප්‍රාදේශීය ලේකම් කොට්ඨාසයේ දඹල සහ නාලියක්ද ප්‍රදේශවල මාර්ග අඩි දෙකක්  පමණ ජලයෙන් යට වී තිබිණි.

මගුරු ගග පිටාර ගැලීමෙන් පාලින්ද නුවර ප්‍රාදේශීය ලේකම් කොට්ඨාසයේ පහත් බිම් රැසක් ද වළල්ලාවිට  ප්‍රාදේශීය  ලේකම්  කොට්ඨාසයේ  යගිරල  ඉහළ කන්ද ප්‍රදේශයේ  මාර්ගය  අඩි දෙකක් පමණ ජලයෙන් යටව තිබිණි.

බුලත්සිංහල පරගොඩ කළුවල වෙල, නරවැල්ල මාර්ගය සහ දෙහිපිටිය දිගනගොඩ මාර්ගය ජලයෙන් යටවීම නිසා ප්‍රදේශවාසීන්ට  ගමනාගමනයට බාධා පැමිණ තිබේ.

කළුතර දිස්ත්‍රිකය ගංගා රැසක ජල මට්ටම් ඉහළ යමින් තිබෙන අතර ඉදිරි පැය කීපයේ ද වර්ෂාව පැවතියහොත් ප්‍රදේශ කිහිපයක හදිසි ගංවතුර අවදානමක් ඇතිවිය හැකි නිසා  පහත් බිම් හා ගංගා ආශ්‍රිත පදිංචි  ජනතාව  අවධානයෙන් පසුවන්නැයි කළුතර ආපදා කළමනාකාර ඒකකය දැනුම් දෙයි.