(විනීතා එම් ගමගේ)

කොළඹ සහ අවට තදාසන්න ප්‍රදේශවල බහුවිධ ප්‍රවාහන මධ්‍යස්ථාන පිහිටුවීමේ සංකල්පය ක්‍රියාවට නැංවීමේ කටයුතු ආරම්භ කරන්නැයි ප්‍රවාහන ඇමතිනි පවිත්‍රා වන්නිආරච්චි මහත්මිය අදාල අංශවලට අද (14) උපදෙස් දුන්නාය.

එමෙන්ම ප්‍රවාහන ක්‍ෂෙත්‍රය නිසා සිදුවන පාරසරික දූෂණය අවම කිරීම සඳහා කාබන් විමෝචන ක්‍රියාවලිය පිළිබඳව ගතයුතු ඉදිරි සැලසුම් පිළිබඳව වැඩි අවධානයක් යොමුකරන්නැයි ද ඇමතිනිය උපදෙස් දුන්නාය.

වන්නිආරච්චි මහත්මිය මෙම උපදෙස් දුන්නේ මහකොළඹ ප්‍රවාහන ජාල වැඩිදියුණු කිරීමේ ව්‍යාපෘතියේ ප්‍රගතිය සොයාබැලීම සඳහා අද ( 14 ) ප්‍රවාහන අමාත්‍යංශයේදී පැවති විශේෂ සාකච්ඡාවකදීය.

එහි දී නිලධාරින්ට උපදෙස් දෙමින් අමාත්‍යවරිය සඳහන් කළේ දෛනිකව කොළඹ නගරයට ලක්ෂ 19ක පමණ ජනකායක් පැමිණෙන අතර වාහන ලක්ෂ හයකට ආසන්න ප්‍රමානයක් විවිධ ප්‍රදේශ වලින් ඇතුළුවන බව හෙලිවී ඇති බවත්ය.

මේ හේතුවෙන් කොළඹ සහ කොළඹ අවට තදාසන්න ප්‍රදේශවල විශාල වාහන තදබදයක් ඇතිවී ඇතැයි කී ඇය මේ තුලින් සිදුවන වායු දූෂනය සහ ශබ්ද දූෂණය ඉතා ඉහල අගයකට පත්වී ඇති බැවින් වායු දූෂනය අවම කිරීමට ද අවධානය යොමු කරන්නැයි නිලධාරින්ට උපදෙස් දුන්නාය.