(සුජිත් හේවාජුලිගේ සහ අංජුල මහික වීරරත්න)

ආණ්ඩුව ඩොලර් මිලියන 50 ක් වැයකර කෆීර් යානා අලුත්වැඩියා කිරීමේ කටයුත්තක් අරඹා ඇති බවටතොරතුරු වාර්තා වන හෙයින් ඒ කටයුතු වහාම නවත්වා එම මුදල් කොරෝනා මර්දන කටයුතුවලට යොදවන්නැයි විපක්ෂ නායක සජිත් ප්‍රේමදාස මහතාපාර්ලිමේන්තුවේ දී ඊයේ (5 )ඉල්ලීමක් කළේය .

ඒ මුදල්වලින් කොරෝනා අරමුදල ශක්තිමත් කරන්නැයි ද ජනාධිපති වරයාට යෝජනා කරන බව ඔහු කීය.

ශරීර සුවතාවය සාක්ෂාත් කිරීම සඳහා රුපියල් කෝටි 65 ක් වැයකර කායවර්ධන මධ්‍යස්ථාන ඇරඹීමට රජය සූදානම් වීම හොඳ දෙයක් වුවත් මේ අවස්ථාවේදී එය සුදුසු නැති බවත් ඒ මුදලුත්කොරෝනා ව්‍යසනය පරාජය කිරීම සඳහා යොදවන්නැයි රජයෙන් ඉල්ලීමක් කරන බවත් විපක්ෂ නායකවරයා මෙහිදී පැවසුවේය.

විපක්ෂ නායකවරයා මෙසේ පැවසුවේ සභාවේ කටයුතු ආරම්භයේ දී ප්‍රකාශ කරමිනි .

මේ ප්‍රකාශයෙන් පසු නැගී සිටි ක්‍රීඩා අමාත්‍ය නාමල් රාජපක්ෂ මහතා පැවසුවේ කායවර්ධන මධ්‍යස්ථාන පිහිටුවීම සඳහා එම මුදල ගත්තේ කොවිඩ් අරමුදලින් වත් ඒ සඳහා වෙන්වූ මුදල් වලින් වත් නොවන බව කීය.

ඒක අයවැය යෝජනා අනුව ආපු කැබිනට් පත්‍රිකාවක් බවත් මේ අවස්ථාවේදී අප කරන්නේ ප්‍රසම්පාදනය පමණක් බවත් ඇමතිවරයා පැවසුවේ ය. මුදල් වෙන් කිරීමක් නොකරන බවද ඔහු කීය.

කොරෝනා මර්දන කටයුතු සඳහා මුදල් අමාත්‍යාංශය කලට වෙලාවට මුදල් ලබා දෙන බවත් කොවිඩ් වලට වෙන්කර ඇති මුදල් වෙනත් ව්‍යාපෘති වලට කිසිසේත් නොයොදවන බවත් නාමල් රාජපක්ෂ මහතා පැවසීය.