(ෂේන් සෙනෙවිරත්න)

බැංකු ගිණුම් හිමියන් රවට ඔවුන්ගේ ගිනුම්වලින් මුදල් අදින සංවිධානාත්මක කල්ලියක් සම්බන්ධයෙන් පැමිණිලි අටක් ලැබී ඇතැයි මහනුවර මූලස්ථාන පොලිසිය කියයි. 

රජයේ සහ පෞද්ගලික බැංකුවල ගිණුම් හිමියන් රවටා ඔවුන්ගේ ගිණුම්වල මුදල් අදින එම සංවිධානාත්මක කල්ලිය පිළිබඳව මහනුවර මූලස්ථාන පොලිසිය විමර්ශන ආරම්භ කොට තිබේ .

එම සංවිධානාත්මක කල්ලිය ඔවුන්ගේ ගොදුරු වශයෙන් යොදාගනු ලබන්නේ වයස අවුරුදු 45-50 ඉක්මවූ පරිගණක තාක්ෂණය පිළිබඳ අඩු දැනුමක් ඇති පුද්ගලයන් බවද පොලිසිය කියයි .

ඔවුන්ගේ ගිණුම්වල මුදල් ඇති බවට කිසියම් ආකාරයකට සොයාගන්නා මෙම සංවිධානාත්මක කල්ලිය පළමුව සිදු කරනු ලබන්නේ ඔවුන්ගේ ජංගම දුරකථන අංකය සොයාගෙන ඔවුන්ට මුදල් ත්‍යාගයක් ඇති බව පවසා ඔහුගේ හෝ ඇයගේ හැඳුනුම්පත් අංකය සහ ගිණුම් අංකය ලබාගැනීමත් බවත් ඉන් අනතුරුව ඔවුන්ගේ ජංගම දුරකථන අංකයට ලැබෙන එක් වරක් පමණක් භාවිතා කළ හැකි තාවකාලික රහස් අංකය (OTP) එම සංවිධානාත්මක කල්ලියට ලබා දෙන ලෙස දැනුම් දෙන බව පොලිසිය කියයි .