( තිලකරත්න දිසානායක සහ ටෝනි කරුණානායක.)

ගම්පහ නගරයේ විජයාරාම පාර, කුණ්ඩිවිල ඇල මාර්ගය අද්දර කසළ ගොඩක තිබී අත් බෝම්බයක් හමුවූ බව ගම්පහ මූලස්ථාන පොලීසිය සඳහන් කරයි. 

කුණ්ඩිවිල ඇල මාර්ගය අසලින් අද (17) පෙරවරුවේ ගමන් ගත් අයෙකු විසින් බෝම්බයක් වැනි දෙයක් තිබෙනු දැක පොලීසිය දැනුවත් කිරීමෙන් අනතුරුව මේ සම්බන්ධයෙන් පරීක්ෂණ සිදු කොට ඇති අතර මෙහි කොටස් දිරාපත්ව තිබූ බව පොලීසිය පවසයි. 

මෙම බෝම්බය කුමක්ද යන්න නිශ්චිතව හදුනා ගනිමින් අවශ්‍ය වුවහොත් පුපුරවා හැරීම පිනිස බෝම්බ නිශ්ක්‍රීය අංශය කැදවීමට පොලීසිය පියවර ගෙන තිබිණි.  

මේ සම්බන්ධයෙන් ගම්පහ කොට්ඨාසය බාර ජේෂ්ඨ පොලිස් අධිකාරී ජගත් රෝහණ මහතාගේ උපදෙස් පරිදි සහකාර පොලිස් අධිකාරී තුසිත කුමාර සහ ගම්පහ මූලස්ථාන ප්‍රධාන පොලිස් පරීක්ෂක මොහාන් සිල්වා යන මහත්වරුන්ගේ අධීක්ෂණය මත අපරාධ විමර්ශන අංශාධිපති පොලිස් පරීක්ෂක මාලින්ද කුමාර මහතාගේ මෙහෙයවීමෙන් වැඩි දුර පරීක්ෂණ සිදු කෙරෙමින් පැවතිණි.