(නිමල් ජයරත්න)

දින හතකට ආසන්න කාලයක් පොළොන්නරුව මඩකලපුව ප්‍රධාන මාර්ගය මනම්පිටිය ගල්ලෑල්ල ප්‍රදේශය  ගංවතුරෙන් යටව පැවතීමත් එම මාර්ගයේ ගමන් ගන්නා මගී ජනතාව, රෝගීන් ඇතුළු රාජ නිලධාරීන් ප්‍රවාහන පහසුකම්වලින් ඇති දුෂ්කරතා හේතුවෙන් දැඩි අසීරුතාවයට පත්ව සිටිති.

මනම්පිටිය මහවැලි ගඟ පිටාර ගැලීම හේතුවෙන් පොළොන්නරුව මඩකලව ප්‍රධාන මාර්ගය මනම්පිටිය ගල්ලෑල්ල ප්‍රදේශය දින කිහිපයක සිට වසා තැබූ අතර පළවෙනිදා ගංවතුර තත්ත්වයන් බැස යාමත් සමග    බර වාහන ගමනාගමනයට ආරක්ෂක අංශ විසින් ගමන් කිරීමට අවසර දුන්නද දෙවැනිදා උදෑසන වන විට නැවතත් එම මාර්ගයේ ගංවතුර තත්ත්වය වැඩිවීමත් සමග මාර්ගය සම්පූර්ණයෙන්ම වසා දැමීමට ආරක්ෂක අංශ පියවර ගත්හ.

කදුරුවෙල, මනම්පිටිය අතර ගංවතුර තත්ත්වය බැසයාමත් සමඟ කදුරුවල මනම්පිටිය අතර මගී ජනතාව ප්‍රවාහනයට යොදවා තිබූ දුම්රියද මඩකලපුවට යැවීමට දුම්රිය දෙපාර්තමේන්තුවේ බලධාරින් පියවර ගත්හ.

දෙවැනිදා උදෑසන වන විට පොළොන්නරුව මඩකලපුව ප්‍රධාන මාර්ගයේ මනම්පිටිය ගල්ලෑල්ල ප්‍රදේශය නැවත වරක් ජලයෙන් සම්පූර්ණ යටවීමත් සමග කදුරුවල නගරයට දුම්රියෙන් යෑම සඳහා ‍ප්‍රවේශපත්‍ර ලබාගැනීමට මනම්පිටිය දුම්රිය ස්ථානයේ දැඩි තදබදයක් හටගෙන තිබූ අතර ප්‍රවේශපත්‍ර ලබාගැනීම සඳහා කිලෝමීටර් දෙකක් පමණ දුරට දිගු පෝලිම්ද දක්නට ලැබිණි.