ගාසා තීරයේ උග්‍ර ආහාර හිඟයක් ඇති වී තිබෙන බවත් ගසා තීරයේ ජබලියා සරණාගත කඳවුරේ ප්‍රමාණවත් පරිදි ආහාර නොමැතිවීම හේතුවෙන් එහි සිටි අශ්වයන් දෙදෙනෙකු ඝාතනය කර සිය දරුවන්ගේ කුසගින්න නිවීමට දෙමාපියන් පෙළඹී ඇති බවත් පලස්තීන මාධ්‍ය වාර්තා කළේය.

සිය දරුවන් කුසගින්නේ මියයාමට නොදී බේරා ගැනීම සඳහා වෙන විකල්පයක් නොතිබූ බව එම දෙමාපියන් පවසා ඇත.

තමන්ට කුසගින්නේ සිටිය හැකි වුවත් වයස අවුරුදු 4 - 5 වයස් වල සිටින සිය දරුවන් කුසගින්නේ නින්දට ගොස් කුසගින්නේ අවදිවනු දැකීම දෙමාපියන් වශයෙන් දරාගත නොහැකි බව ඔවුහූ ප්‍රකාශ කළහ.

එසේම උතුරු ගාසා තීරයේ මාස දෙකක් පමණ වයසැති පලස්තීන ජාතික බිළිඳකු  ප්‍රමාණවත් ආහාරයක් නොලැබීමෙන් ශරීරය දුර්වලවීම හේතුවෙන් මිය ගොස් ඇති බවද  පලස්තීන මාධ්‍ය වාර්තා කළේය.

මහමුද් ෆටූ නම් මෙම බිළිඳා පසුගිය සිකුරාදා අල් ශිෆා රෝහලේදී මියගොස් ඇති බව පලස්තීන මාධ්‍ය සඳහන් කළේය.

ළමා මරණ වැඩිවිය හැකි බවට එක්සත් ජාතීන්ගේ සංවිධානය අනතුරු අඟවා දවස් කිහිපයක් ගතවෙත්ම මෙම මරණය වාර්තා විය.අල් ශිෆා රෝහලේ ඇඳක් මත හුස්ම ගැනීමට උත්සාහ දරන එම දරුවාගේ වීඩියෝවක් ලැබීමෙන් මෙම සිදුවීම තහවුරුකර ගැනීමට හැකි වූ බවද අල් ජසීරා පුවත් සේවය සඳහන් කළේය.