(ගයාන් සූරිය ආරච්චි  සහ බිමල් ශ්‍යාමන් ජයසිංහ)

ජපානයේ රැකියා දෙන බව පවසා විවිධ පුද්ගලයන්ගෙන් රුපියල් කෝටියකට ආසන්න මුදලක් ගිණුමකට බැර කරගත් බව කියන පුද්ගලයෙක් අපරාධ පරීක්ෂණ දෙපාර්තමේන්තුවේ මූල්‍ය විමර්ශන අංක 2 අංශය මගින් අත්අඩංගුවට ගනු ලැබීය.

මෙසේ අත්අඩංගුවට ගෙන ඇත්තේ මහව, උඩුගම ප්‍රදේශයේ 34 හැවිරිදි පුද්ගලයෙකි.

අත්අඩංගුවට ගත් සැකකරු ජපානයේ රැකියා සඳහා යවන බව පවසා දිවයිනේ විවිධ ප්‍රදේශවල සිටින පුද්ගලයන් රැසකගේ මුදල් වංචා කර ඇති බව අපරාධ පරීක්ෂණ දෙපාර්තමේන්තුව පවසයි.

අපරාධ පරීක්ෂණ දෙපාර්තමේන්තුවේ මූල්‍ය විමර්ශන අංශය 2 වෙත පැමිණිලි රැසක් ලැබී ඇති අතර ඒ සම්බන්ධයෙන් සිදුකළ විමර්ශන වලින් අනතුරුව සැකකරු අත්අඩංගුවට ගනු ලැබීය.

අත්අඩංගුවට ගත් සැකකරු අධිකරණයට ඉදිරිපත් කිරීමට නියමිතව තිබුණි.

අපරාධ පරීක්ෂණ දෙපාර්තමේන්තුව භාර නියෝජ්‍ය පොලිස්පති රොහාන් ප්‍රේමරත්න මහතාගේ උපදෙස් පරිදි මූල්‍ය විමර්ශන අංශය 2 වැඩිදුර විමර්ශන සිදු කරයි.