(යොහාන් භාසුර)

ඩෙංගු රෝගීන්ගේ සංඛ්‍යාව පසුගිය වසරේ මෙම කාලයට සාපේක්ෂව තුන් ගුණයකින් ඉහළ ගොස් ඇති බවත් පසුගිය සතියේ පමණක් ඩෙංගු රෝගීන් 1200 කට ආසන්න සංඛ්‍යාවක් වාර්තා වී ඇති බවත් සෞඛ්‍ය අමාත්‍යාංශයේ උසස් නිලධාරියෙක් පැවැසීය.

පසුගිය වසරේ මෙම කාලය තුළ ඩෙංගු රෝගීන් 20000 කට ආසන්න සංඛ්‍යාවක් පමණක් වාර්තා වී ඇති බවත් මෙම වසරේ ඩෙංගු රෝගීන් 60000 කට ආසන්න සංඛ්‍යාවක් හඳුනාගෙන ඇති බවත් සෞඛ්‍ය අමාත්‍යාංශ වාර්තා සඳහන් කරයි.

කොළඹ, ගම්පහ සහ කළුතර යන දිස්ත්‍රික්කවලින් වැඩිම රෝගීන් සංඛ්‍යාවක් වාර්තා වී ඇති අතර මහනුවර, ගාල්ල, යාපනය, කෑගල්ල, පුත්තලම සහ කුරුණෑගල යන දිස්ත්‍රික්කවලින්ද පසුගිය වසරට සාපේක්ෂව වැඩි ඩෙංගු රෝගීන් සංඛ්‍යාවක් වාර්තා වී තිබේ. 

ඩෙංගු රෝග ව්‍යාප්තිය සැලකිල්ලට ගනිමින් සෞඛ්‍ය වෛද්‍ය නිළධාරී කොට්ඨාස 36ක් අධි අවධානම් ඩෙංගු කලාප ලෙස නම් කර ඇති පසුබිමක් තුළ මෙවැනි වර්ධනයක් පෙන්නුම් කිරීම කැපී පෙනෙන බව සෞඛ්‍ය අමාත්‍යංශය සඳහන් කරයි.