(මනෝප්‍රිය ගුණසේකර)

නිතී විරෝධී ආකාරයෙන් ද්විත්ව පුරවැසිභාවය දැරීම සම්බන්ධයෙන් හිටපු රාජ්‍ය අමාත්‍ය ඩයනා ගමගේ මහත්මියට එරෙහි අධි චෝදනා පත්‍රය සංශෝධනය කිරීමට අවසර දුන් කොළඹ මහාධිකරණ විනිසුරු මංජුල තිලකරත්න මහතා පූර්ව නඩු විභාග සම්මන්ත්‍රණය නොවැම්බර් 04 වැනිදා පැවැත්වීමට අද (05) නියම කළේය.

නඩුව කැඳවූ අවස්ථාවේදී පැමිණිල්ල වෙනුවෙන් පෙනී සිටි රජයේ නීතිඥ අමිතා ධර්මදාස මහත්මිය කරුණු දක්වමින් සාක්ෂි ලැයිස්තුවට තවත් සාක්ෂිකරුවකු එක් කිරීමට නතීපතිවරයා තීරණය කර ඇති හෙයින් සාක්ෂි ලැයිස්තුව සංශෝධනය කිරීමට අවසර දෙන්නැයි කළ ඉල්ලීමක් පිළිගනිමින් විනිසරුවරයා එලෙස නියම කළේය.

2004 ඔක්තෝම්බර් 09 වැනිදාත් 2004 දෙසැම්බර් පළමුවැනිදාත් කාලය තුළ ශ්‍රී ලාංකීය පුරවැසියකු නොවන බව දැන දැනම හා සිය නාමය ඩයනා ගමගේ ලෙස නීත්‍යානූකූලව සශෝධන කර නොතිබියදී ඩයනා ගමගේ ලෙස ජාතික හැඳුන්ම්පතක් ලබා ගැනීමට කූඨ ලේඛන ඉදිරිපත් කර පුද්ගලයින් ලියාපදිංචි කිරීමේ දෙපාර්තමේන්තුවේ අධ්‍යක්ෂක ජනරාල්වරයා ඇතුළු නිළධාරීන් රැවටීම සහ අංක 4685 දරණ උප්පැන්න සහතිකය කූඨ ලෙස සෑදීමට අනුබල දීම ඇතුළු චෝදනා යටතේ නීතීපතිවරයා විත්තිකාරියට එරෙහිව චෝදනා නඟා ඇත.

නඩුව කැඳවනු ලැබු අවස්ථාවේදී විත්තිකාරිය අධිකරණයේ පෙනී සිටියාය.

පැමිණිල්ල වෙනුවෙන් පෙනී සිටි රජයේ නීතිඥ අමිතා ධර්මදාස මහත්මිය කරුණු දක්වමින් මෙම නඩුවේ සාක්ෂි ලැයිස්තුවට තවත් සාක්ෂිකරුවකු එක් කිරීමට නීතීපතිවරයා තීරණය කර ඇති හෙයින් සාක්ෂි ලැයිස්තුව සංශෝධනය කිරීමට අවසර දෙන්නැයි ඉල්ලා සිටියාය.

විත්තිකාරිය වෙනුවෙන් පෙනී සිටි ජනාධිපති නීතීඥ ශානක රණසිංහ මහතා කරුණු දක්වමින් මෙම නඩුවේ නඩු භාණ්ඩයක් ලෙස නම් කර ඇති තම සේවාදායිකාවගේ උප්පැන්න සහතිකය අඩංගු මුල් ගොනුව නඩු විභාගය ආරම්භ කිරීමට පෙර පරීක්ෂා කිරීමට අවශ්‍ය වී ඇති හෙයින් ඒ සඳහා අවසර දෙන්නැයි ඉල්ලා සිටියේය.

කරුණු සළකා බැලීමෙන් අනතුරුව විත්තිකාරියගේ උප්පැන්න සහතිකය අඩංගු මුල් ගොනුව මේ වන විට ඇති ස්ථානයේ සිට සතියක කාලයක් තුළ උසාවියට ඉදිරිපත් කිරීමට රහස් පොලිසියේ අධ්‍යක්ෂවරයාට නියෝග කළ විනිසුරුවරයා නඩුවට අදාලව ඇති ලේඛන වල සම්පූර්ණ ගොනුව ඉදිරි නඩු දිනයේ අධිකරණයට ඉදිරිපත් කරන ලෙස මහාධිකරණ ලේඛාධිකාරීවරයාට නියම කළේය.