ශ්‍රී ලංකාව තුළ වූ ආරම්භක ව්‍යාපාර සංවර්ධනය සඳහා අඛණ්ඩ සහයෝගය ලබාදෙන ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනය (ICTA) විසින්, ඔවුන්ගේ නවතම තාක්ෂණික නවෝත්පාදන දිරිගැන්වීමේ ව්‍යාපෘතිය “10,000 IDEAS”‍ මැයෙන් පසුගියදා දියත් කරන ලදී.

විවිධ හවුල්කාර පාර්ශ්ව රැසකගේ සහයෝගය ඇතුව ක්‍රියාත්මක වන මෙම වැඩසටහන අනාගත ලොව වෙත දක්ෂ සහ නිපුණතා තුළින් සන්නද්ධ තාක්ෂණ ව්‍යවසායකයන් නිර්මාණය කිරීමට ක්‍රියාත්මක වන අතර, විශේෂයෙන්ම ගෝලීය වෙළෙඳපොළ ජයගත හැකි නව්‍ය අදහස් ඇති තාක්ෂණික ව්‍යවසායකයන් මේ හරහා සංවර්ධනය කරයි. ඒ ඔස්සේ 2024 වර්ෂය වනවිට, තාක්ෂණික ආරම්භක ව්‍යාපාර 1,000ක් නිර්මාණය උදෙසා වූ ICTA හි දැක්ම සාක්ෂාත් කරගැනීමට බලාපොරොත්තු වේ.

මෙම වැඩසටහන හරහා පාසල් ශිෂ්‍යයන්, තරුණ තරුණියන් ඇතුළු ඕනෑම වයස් කාණ්ඩයක අයකු සතු සුවිශේෂී නව්‍ය ව්‍යාපාර අදහස් හඳුනා ගනිමින් ඔවුන්ගේ ව්‍යවසායක සිහින සාක්ෂාත් කරගැනීම උදෙසා වූ අවශ්‍ය අඛණ්ඩ සහයෝගය ලබා දේ. විශේෂයෙන්ම, සිය නවෝත්පාදන අදහස් සාර්ථක ව්‍යාපාර සැලැස්මක් බවට පත් කරගත හැකිවන අයුරින් අදාළ ව්‍යාපාර සැලසුම් ගොඩනැංවීම උදෙසා “10,000 IDEAS”‍ ව්‍යාපෘතිය ප්‍රමුඛ කාර්යභාරයක් ඉටු කරයි. මේ අනුව නව්‍ය අදහස් ඇති තාක්ෂණික ක්ෂේත්‍රයේ ව්‍යවසායකයන් දිවයිනේ සෑම පළාතක්ම ආවරණය වන අයුරින් හඳුනා ගැනීමට “10,000 IDEAS”‍ ව්‍යාපෘතිය බලාපොරොත්තු වන අතර, ඔවුන්ට ව්‍යාපාර සැලසුම් නිර්මාණය කිරීම සඳහා අවශ්‍ය පූර්ණ මාර්ගෝපදේශනය, පුහුණුව, ආයෝජන ලබාදීම ඇතුළුව විවිධ සහයෝග ලබාදීම සඳහා ICTA අදාළ ක්ෂේත්‍ර හවුල්කරුවන් සමඟ සම්බන්ධ කරනු ඇත.

ජාතික තලයේ මෙම වැඩසටහන පිළිබඳ සිය අදහස් දක්වමින් ICTA හි ප්‍රධාන ඩිජිටල් ආර්ථික නිලධාරි අනුර ද අල්විස් මහතා මෙසේ පැවැසීය.

“ICTA ආයතනය දේශීය ව්‍යවසායකයන් සංවර්ධනය වෙනුවෙන් විශාල මෙහෙවරක් සිදුකරමින් සිටිනවා. විශේෂයෙන්ම ගෝලීය අභියෝග සඳහා සාර්ථක විසඳුම් ඉදිරිපත් කළ හැකි තාක්ෂණික නවොත්පාදකයන් නිර්මාණය කිරීම උදෙසා, ICTA විශාල අවධානයක් යොමු කරමින් ක්‍රියා කරනවා. එම ගමන් මගෙහි තවත් එක් සාර්ථක පියවරක ආරම්භයක් ලෙස මෙම “10,000 IDEAS” ව්‍යාපෘතියේ ආරම්භය හඳුන්වන්න මා කැමැතියි. තාක්ෂණික ක්ෂේත්‍රයේ නවොත්පාදකයන් සහ ව්‍යවසායකයන් හට අනාගත ලොව ජය ගැනීම සඳහා විශාල අවස්ථා රැසක් පවතිනවා. අපට අවශ්‍ය අපගේ හවුල්කරුවන් සමඟ එක්වෙමින්, මෙම වැඩසටහන හරහා මොවුනට සාර්ථක ව්‍යවසායකයන් වීමට අවශ්‍ය පූර්ණ සහයෝගය ලබාදීමට. “10,000 IDEAS” හරහා තාක්ෂණික ක්ෂේත්‍රයේ ව්‍යවසායකයන්ට සිය ව්‍යවසායක සිහින මෙන්ම රටේ ආර්ථික අරමුණු සාක්ෂාත් කරගැනීම සඳහා විශාල සහයෝගයක් ලැබෙන බව අපට විශ්වාසයි.”‍