(අංජුල මහික වීරරත්න)

හැත්තෑ හය වැනි ජාතික නිදහස් උළෙල "හදමු අලුත් රටක්" තේමාවෙන් කොළඹ ගාලු මුවදොර දී අද පෙරවරුවේ අභිමානවත් අයුරින් පැවැත්වෙයි.

ජනාධිපති රනිල් වික්‍රමසිංහ මහතාගේ ප්‍රධානත්වයෙන් පැවැත්වෙන නිදහස් උළෙල සඳහා ගෞරවනීය ආරාධිතයා ලෙස තායිලන්ත අග්‍රාමාත්‍ය ස්‍රෙතා තැවිසින් (Srettha Thavisin) මහතා සහභාගී වෙයි. ජනාධිපති රනිල් වික්‍රමසිංහ මහතා මෙවර නිදහස් උළෙල ඇමතීමක් නොකරන බව ජනාධිපති කාර්යාලයේ ජ්‍යෙෂ්ඨ ප්‍රකාශකයෙක් කීය.

එමෙන්ම නිදහස් උළෙල සංස්කෘතිකාංග වලින් තොරව ත්‍රිවිධ හමුදා උත්තමාචාර වලට පමණක් සීමා කිරීමට ද තීරණය කර ඇත.

ස්වදේශ කටයුතු රාජ්‍ය අමාත්‍ය අශෝක ප්‍රියන්ත මහතා කීවෙි තායිලන්ත අග්‍රාමාත්‍යවරයාගේ දෙදින නිල සංචාරය අසනීප තත්ත්වයක් නිසා එක් දිනකට සීමා වී ඇති හෙයින් ඔහු පැයක කාලයක් සඳහා පමණක් නිදහස් උළෙලට සහභාගී වන බවයි. නිදහස් දිනයට පැමිණෙන ආරාධිතයන්ට පිළිගැන්වීම සඳහා රජයේ ප්‍රවෘත්ති දෙපාර්තමේන්තුව විශේෂ සමරු කලාපයක් සම්පාදනය කරන අතර නැවත පරිශීලනය කළ හැකි සමරු කළඹක් ලෙස එය සකසන ලෙස ජනාධිපති රනිල් වික්‍රමසිංහ මහතා රජයේ ප්‍රවෘත්තිය අධ්‍යක්ෂ ජනරාල් දිනිත් චින්තක කරුණාරත්න මහතාට උපදෙස් දී දුන්නේය.

එමෙන්ම එම සමරු කළඹෙහි ශ්‍රී ලංකා තායිලන්ත නිදහස් වෙළෙඳ ගිවිසුම සිංහල, දෙමළ, ඉංග්‍රීසි සහ තායි භාෂා වලින් පළ කරන ලෙසත් ජනාධිපතිවරයා දැනුම් දී තිබේ.

ඡායා ළහරු හර්ෂණ