(කේ බුද්ධික කුමාරසිරි)

නවගමුවේ පත්තිනි මහ දේවාලයේ පරිවාර දේවාලවල මුද්‍රා තැබු පිංකැටවලට අමතරව රහසිගතව තවත් පිංකැට තබා මුදල් රැස්කරන ජාවාරමක් ඇති බැවින් ඒ පිළිබඳව කඩිනමින් සොයා බලන ලෙස නවගමුව සුරැකීමේ සංවිධානය විගණකාධිපතිවරයාට හා බෞද්ධ කටයුතු කොමසාරිස් ජනරාල්වරයාට ලිඛිතව දන්වා යවා ඇත.

  එසේම දේවාලවලට පුජාකරන රත්තරන් භාණ්ඩ ආදිය ගැනද තවමත් නිසි විගණනයක් නොමැති නිසාවෙන් දිගින් දිගටම වංචා සිදුවන බවද එම ලිපිය මගින් අවධාරණය කර ඇත.

  නවගමුව සුරැකීමේ සංවිධානයේ ලේකම් ජයන්ත ජයලාල් සහ සභාපති චන්ද්‍රසේන පලිහේන මහත්වරුන් ගේ අත්සනින් විගණකාධිපතිවරයා සහ බෞද්ධ කටයුතු කොමසාරිස් ජනරාල්වරයා වෙත යැවූ ලිපිය මෙසේය.

නවගමුව පත්තිනි දේවාලය ඇතුළු මෙම පුදබිමේ ඇති  සියළු දේවාලවලින් මාසික ලැබෙන කෝටි ගණනක ආදායම අවභාවිතාවන බව  අප  විසින් මීට පෙර ඔබතුමාටත් බෞද්ධ කටයුතු කොමසාරිස් ජනරාල්තුමාටත් පැමිණිලි කළෙමු.

  ඒ අනුව  ඔබ කාර්යාලයේ උපදෙස් මත බෞද්ධ කටයුතු කොමසාරිස් කාර්යාලය මගින් නවගමුවේ සියළු පිංකැටවලට මුද්‍රා තබන ලදි.
  නමුත් මේ වනවිට එම මුද්‍රාතැබු පිංකැටවලට අමතරව පත්තිනි මහ දේවාලය හැර අනෙක් සියළුම දේවාලවල අමතර පිංකැටයක් තබා රහසේම මුදල් එකතුකරගන්නා බව අපට නිරික්ෂණයවි ඇත..

  එම නිසා අප ඉදිරිපත්කරන මෙම පැමිණිල්ල පිළිබඳව වි⁣⁣ශේෂ අවධානය යොමුකර නා කැලේ පත්තිනි දේවාලය, විෂ්ණු දේවාලය,කතරගම දේවාලය,ගම්භාර දේවාලය ඇතුළු සියලුම දේවාලවල මුද්‍රාතැබු පිංකැටවලට අමතරව තවත් පිංකැට තබා මුදල් රැස්කිරිමේ ජාවාරම වලක්වන ලෙස කාරුණිකව ඉල්ලා සිටිමු.

  එසේම දේවාලවලට ලැබෙන රත්තරන් භාණ්ඩ ආදිය කිසිදු ලේඛනගත කිරිමක් නොකර තවමත් අවභාවිතා වන බවද ⁣ඔබතුමන් වෙත මෙමගින් දැනුම්දි සිටිමු.

මේ සම්බන්ධයෙන් අප නවගමුව පත්තිනි මහා දේවාලයේ භාරකාර සහ නවගමුව ශ්‍රි සුගතබිම්බාරාම රාජමහා විහාරස්ථානයේ විහාරාධිපති කල්‍යාණි සාමග්‍රී ධර්ම මහා සංඝ සභාවේ මහානායක මල්වානේ පඤ්ඤාසාර නාහිමියන් සිදු කල විමසීමේදී මෙසේ වදාලහ. නවගමුව සුරැකීමේ සංවිධානය කියන්නේ පන්සලත් එක්ක තරහ කණ්ඩායමක් හදා ගත්තු සංවිධානයක්. එහි සභාපති ධූරය දරන්නෙත් අපේ දායක සභාවේ උප සභාපතිවරයාම තමයි. රහසිගත කැට තියෙනවා කියල කියනව නම් ඇවිත් බලන්න. මම කිව්වට පිලි ගන්න එපා. ඇවිත් බලලම වාර්තා කරන්න