(නිමන්ති රණසිංහ)

පුත්තලම දිස්ත්‍රික් පාර්ලිමේන්තු මන්ත්‍රී හිටපු රාජ්‍ය අමාත්‍ය සනත් නිශාන්ත මහතා පැමිණී ජලසම්පාදන ව්‍යාපෘති අමාත්‍යාංශයට අයත් වී 8 වර්ගයේ ජීප් රථයට කොළඹදී ඉකුත් 09 වැනිදා ඇතිවූ ප්‍රචණ්ඩකාරී ක්‍රියාවලදී ගල් ගසා හානි කළ සැකකරුවන් වහාම අත්අඩංගුවට ගෙන අධිකරණයට ඉදිරිපත් කරන ලෙසට කොළඹ ප්‍රධාන මහේස්ත්‍රාත් නන්දන අමරසිංහ මහතා කුරුදුවත්ත පොලීසියට අද (30) නියෝග කළේය.

අයුතු ජන රාශියක සාමාජිකයන්ව සිටිමින් මෙම රථයට හානි කළ අදාළ සැකකරුවන් සී සී ටී වී කැමරා දර්ශන පරිශීලනය කිරීමෙන් පසු වහාම අත්අඩංගුවට ගෙන අධිකරණයට ඉදිරිපත් කරන ලෙස ද මෙහිදී මහේස්ත්‍රාත්වරයා කුරුදුවත්ත පොලීසිය නියෝග නියෝග කළේය.

මෙම ප්‍රහාරයෙන් හානි වූ පී 70700 දරන වී 8 වර්ගයේ අදාළ ජීප් රථය සම්බන්ධයෙන් කුරුදුවත්ත පොලීසියට ගොස් පරීක්ෂාකර බලා එහි රස පරීක්ෂක වාර්තාවක් අධිකරණයට ඉදිරිපත් කරන ලෙසද මහේස්ත්‍රාත්වරයා රජයේ රස පරීක්ෂකවරයාට ද නියෝගයක් නිකුත් කළේය.

පාර්ලිමේන්තු මන්ත්‍රී සනත් නිශාන්ත මහතා සහ ඔහුගේ ආරක්ෂක නිලධාරියා වන ප්‍රධාන පොලිස් පරීක්ෂක ප්‍රියන්ජිත් සහ පොලිස් සැරයන් සමන්ත යන නිලධාරින් සමග අරලියගහ මන්දිරයේ පැවැති උත්සවයට සහභාගී වීමෙන් පසු මෙම රථය නැවත අමාත්‍යාංශය වෙත රැගෙන යමින් සිටියදී කාළඹ පුස්තකාල වටරවුමේදී මෙසේ ප්‍රහාරයට ලක් වූ බව පාර්ලිමේන්තු මන්ත්‍රීවරයාගේ පුද්ගලික රියැදුරු නලින් පුෂ්පකුමා මහතා ඉකුත් 24 වැනිදා පැමිණීල්ලක් ඉදිරිපත් කළ බව කුරුදුවත්ත පොලීසිය අධිකරණයට කරුණු ඉදිරිපත් කර තිබිණී.

ඉදිරිපත් වූ කරුණු සැලකිල්ලට ගත් අධිකරණය සිද්ධිය සම්බන්ධයෙන් විමර්ශන පවත්වා අදාළ සැකකරුවන් අත්අඩංගුවට ගෙන ඉදිරිපත් කරන ලෙසට කුරුදුවත්ත පොලීසියට නියම කළේය.