(ආරියරත්න රණබාහු)

බුදු සසුන සෝබමාන කළ සියලු දනන්ගේ මහත් භක්තිය ආදරයට ලක් වූ  ශ්‍රේෂ්ඨ සංඝ පීතෘවරයකු වන කොළඹ හුණුපිටිය  ගංගාරාමාධිපති අපවත් වී වදාළ ආචාර්ය  ගල්බොඩ ඥාණිස්සර නාහිමියන්ගේ දේහයට ගෞරව දැක්වීම සඳහා අති විශාල පිරිසක් කොළඹ ගංගාරාම විහාරස්ථානයට පෙරවරුවේ සිට  පැමිණෙමින් තිබේ.

නාහිමියන්ගේ දේහය විහාරස්ථානයට ඇතුළුවන ප්‍රධාන ශාලාවේ තැන්පත් කර තිබෙන අතර බොහෝ සැදැහැවත් පිරිස් නාහිමි දේහය අසල වැඳ වැටී මහත් බැතියෙන් නමස්කාර කරන අයුරු සුලභ දසුනක් විය.

අද උදෑසන හයට පමණ ක් නාහිමියන්ගේ දේහය විශේෂ රථ පෙරහරකින් විහාරස්ථානය කරා වැඩම කෙරිණි.

එහිදී  මහා සංඝරත්නය විසින් දේහය පිළිගෙන  විශේෂ පීටිකාවේ තැන්පත් කෙරිණි අනතුරුව මහා සංඝරත්නය විසින් උන්වහන්සේගේ දේහයට ප්‍රථමයෙන් ගෞරව නමස්කාර කරනු ලැබීය

ඉන්පසු මහජනතාවට ගෞරවාචාර පුද කිරීමට අවස්ථාව සලසා දුන් අතර එම අවස්ථාවේදී වරින් වර දවස පුරාම විවිධ ආගමික නායකවරු සහ මැති ඇමතිවරුන් රැසක් උන්වහන්සේට සිය අවසන් ගෞරවය දැක්වූහ.

එම පිරිස අතර කොළඹ අගරදගුරු අති උතුම් මැල්කම්  කාදිනල් රංජිත් හිමිපාණන්, හිටපු ජනාධිපතිවරුන් වන මහින්ද රාජපක්ෂ, ගෝඨාභය රාජපක්ෂ, කථානායක මහින්දයාපා අබේවර්ධන විපක්ෂ නායක සජිත් ප්‍රේමදාස අමාත්‍ය බන්දුල ගුණවර්ධන ගුණවර්ධන පාර්ලිමේන්තු මන්ත්‍රී තිස්ස අත්තනායක යන මහත්වරු වූහ.

නහිමියන්ගේ දේහයට අවසන් ගෞරව දැක්වීම සඳුදා පස්වරු තුන දක්වා කාලය වෙන් කර ඇති බව විහාරාධිකාරී ආචාර්ය ය කිරින්දේ අස්සජී හිමියෝ පැවසූහ.

ආදාහන පූජෝත්සවය  රාජ්‍ය ගෞරව මැද  විහාරස්ථාන අසල ක්‍රීඩාංගනයේ දී පැවැත්වෙන බවද උන්වහන්සේ කීහ.