ගොනා කෝවිලේ රාජා වශයෙන් හඳුන්වනු ලැබූ, සංවිධානාත්මක අපරාධකරුවකු බවට පොලීසිය සඳහන් කරන රාජා විමලධර්ම නම් පුද්ගලයා පසුගිය දිනක පොලීසිය මගින් තබන ලද වෙඩි පහරකින් මරුමුවට පත්විය. ඔහු දැනට සති දෙකකට පමණ ඉහතදී රත්මලානේ සොයිසාපුර හෝටලයකට පහරදී වෙඩි තැබූ සිද්ධියේ ප්‍රධාන සැකකරු වශයෙන් නම සඳහන් වී සිටි තැනැත්තාය.

පොලිස් වෙඩි පහරින් අපරාධකරුවකු මියගිය පළමු අවස්ථාව මෙය නොවේ. එහෙත් අපරාධ ලෝකයේ තෝරු මෝරු ප්‍රමාණයේ පාතාල නායකයකු පොලීසිය මගින් හඹාගොස් වෙඩි තබා ඝාතනය කෙරුණේ සෑහෙන කාලයකට පසුවය. ඝාතනය නොවුණානම් මේ සැකකරු නවතින්නේ විදෙස් රටක වීමට ඉඩ තිබූ බවද ප්‍රකාශ වී තිබිණි. ලංකාවේ අපරාධකාරයන්ට සුපිරි නවාතැන් බවට පත්ව තිබෙන රටවල් ගණනාවක්ම තිබෙන බැවින් ඒ කතාව බොරුවක් යැයි බැහැර කළ නොහැක.

ඒ සමඟ කිවයුත්තේ මෙතුවක් කාලයක් බන්ධනාගාර නිලධාරීන්ට ‘තහනම් කලාපයක්’ බවට පත්ව තිබූ බව කියන කංජිපානි ඉම්රාන්ගේ සිරකුටියට කඩාපැන තහනම් බඩු අල්ලා ගැනීමට බන්ධනාගාර නිලධාරීන් පිරිසක් නිර්භයව ඉදිරිපත් වීමය.

සංවිධානාත්මක අපරාධවලදී සිරගෙවල්වල සිට ක්‍රියාත්මක කෙරෙන ස්මාර්ට් දුරකතනය යනු ‘බර අවියක්’ තරමට භයානක උපකරණයකි. ඒවා අත්අඩංගුවට ගැනීම නිසැකවම බන්ධනාගාරය තුළ සිට ක්‍රියාත්මක කෙරෙන පාතාලයට වැඩක් දීමකි.

ගොනා කෝවිලේ රාජා නම් අපරාධකරු හඹාගොස් ඝාතනය කිරීමද ඒ ආකාරයේම පාතාලයට වැඩක් දීමකි. මේ කරුණු දෙක එකිනෙකට සම්බන්ධයක් නැත. එහෙත් බන්ධනාගාරය තුළ සිට සහ එළියේ සිට ක්‍රියාත්මක වන පාතාල ක්‍රියා මැඬපවත්වන්නැයි තදින්ම නියෝග කරමින් ජනාධිපති ගෝඨාභය රාජපක්ෂ මහතා විසින් පසුගියදා සිදුකළ කතාවෙන් පසුව මේ ක්‍රියා සිදුවීම සුවිශේෂය.

බන්ධනාගාර අභ්‍යන්තර කටයුතු විමර්ශනය කිරීම සඳහා ජනාධිපති කාර්යාලයේදී පැවැති අදාළ සාකච්ඡාවේදී ජනාධිපතිවරයා කියා තිබුණේ රටේ බොහෝ අපරාධ සහ මත්ද්‍රව්‍ය ජාවාරම් බන්ධනාගාරවල සිට මෙහෙයවන බවට නිශ්චිත තොරතුරු තමන් සතු බවය. මෙය වැළැක්වීමේ පියවරක් වශයෙන් බන්ධනාගාර තුළ ජංගම දුරකතන භාවිතය සම්පූර්ණයෙන්ම තුරන් කළයුතු බවද රාජපක්ෂ මහතා කියා තිබිණි. කංජිපානි ඉම්රාන්ගේ සිරකුටිය බන්ධනාගාර නිලධාරීන් අතින් සුද්ද වෙන්නේ එම කතාවෙන් පසුවය. ගොනාකෝවිලේ රාජා පොලීසිය සමඟ වෙඩි හුවමාරුවකදී ඝාතනය වන්නේද ඒ එක්කමය. පාතාලය මර්දනයට ආරක්ෂක අංශ වහාම වැඩ අරඹා ඇති බව මේ සිදුවීම් දෙක කිසියම් සංඥාවක් ලබාදී තිබේ. සාමකාමීව විනයගරුක ලෙස ජීවත්වීමට කැමැති මෙරට සියලු‍ මහජනතාවට මේ සංඥාව පවා කිසියම් අස්වැසිල්ලකි.

මෙරට තුළ සිදුවන මහා පරිමාණ කුඩු ජාවාරම් ඇතුළු සංවිධානාත්මක අපරාධ බන්ධනාගාර තුළ සිට මෙහෙයවනු ලබන බවට කාලයක් තිස්සේම චෝදනා නැඟිණි. මේ වනවිට බන්ධනාගාරගත අපරාධකරුවන් සහ ගෝලබාලයන් පිරිසක් විසින් මේ අපරාධ මෙහෙයවනු ලබන බවත් ඒ සඳහා ඔවුන්ට උපකාර වන ස්මාර්ට් දුරකතන සහ සිම්පත් බන්ධනාගාර ඇතුළේම තිබෙන බවත් සුප්‍රකට රහසකි. ඒවා ඇතුළට යන්නේ දූෂිත බන්ධනාගාර නිලධාරීන් සහ උසාවිවල රාජකාරි කරන ඇතැම් දූෂිත පොලිස් නිලධාරීන් හරහා බවත් නොදන්නා කෙනකු නැත. මේ සංවිධානාත්මක ජාලය තුළ රැඳී සිටින නිලධාරීන්ට මහත් වාසි, නොයෙක් දොළපිදේනි ලැබෙන බවද ඒ සමඟ කියැවේ. කොතරම් උත්සාහ කළත් මේ ජාලය කඩා බිඳ දැමීම පහසු නොවන්නේ මේ දූෂිත ක්‍රියා සහ ඔවුන්ට ඇතැම් ප්‍රබල දේශපාලනඥයන්ගේ සහාය ලැබීම හේතුවෙනි. ඒ සබඳතා කඩාදැමිය හැකි නම් බන්ධනාගාරය ඇතුළේ සිට මෙහෙයවනු ලබන සංවිධානාත්මක ජාවාරම්ද අහෝසි කළ හැකිවනු ඇත.

ජනාධිපතිවරයාගේ ප්‍රවේශය වැදගත් වන්නේ මේ අවස්ථාවේදීය. මෙයට පෙර මෙරට සිටි බොහොමයක් නායකයෝ පාතාලය වනසා දමන බවටත් බන්ධනාගාර තුළට දුරකතන ගෙනයාමට තිබෙන අවස්ථා නැතිකරන බවටත් ප්‍රතිඥා දුන්හ. එහෙත් ඒ කිසිවකුටත් එය ඉටුකර ගත නොහැකි විය. අදටත් කංජිපානි ඉම්රාන්ලා සිටින සිරකුටි ඇතුළේ ස්මාර්ට් දුරකතන රැඳෙන්නේ මේ හේතුවෙනි. එහෙත් අපේ ඉතිහාසය තුළ මෙරට ජාතික ආරක්ෂාවට ප්‍රබලම අභියෝගය එල්ල වූ ත්‍රස්තවාදී යුද්ධය අවසන් කිරීමට ආරක්ෂක ලේකම්වරයා වශයෙන් ගෝඨාභය රාජපක්ෂ මහතා විසින් ලබාදෙන ලද දායකත්වය මෙරට පොදු මහජනතාවට හොඳින්ම මතක තිබේ. සිරගෙවල්වල සිට මෙහෙවන අපරාධ නැතිකිරීමට රාජපක්ෂ මහතා දරන උත්සාහය කෙරෙහි ජනතාවගේ විශ්වාසය ඉහළින්ම රැඳී තිබෙන්නේද ඒ හේතුවෙනි.

මත්ද්‍රව්‍ය ජාවාරම් ඇතුළු පාතාලය විසින් මෙහෙයවනු ලබන මහා පරිමාණ සංවිධානාත්මක අපරාධ ජාලය අපේ රටේ ජාතික ආරක්ෂාවටද එල්ල කර ඇත්තේ මහත් පීඩනයකි. පාතාලය මර්දනය කිරීම ජාතික ආරක්ෂාව එම පීඩනයෙන් ගලවා ගැනීමකි.