(බිමල් ශ්‍යාමන් ජයසිංහ)

කොළඹ කෙසෙල්වත්ත ප්‍රදේශයේ දී පිය පුතු දෙදෙනකු තියුණු ආයුධවලින් කපා කොටා පියා ඝාතනය කර පුතුට බරපතළ තුවාල සිදු කළ බව කියන පුද්ගලයන් දෙදෙනකු අත්අඩංගුවට ගත් බව කොළඹ අපරාධ කොට්ඨාසය කියයි.

එම සැකකරුවන් ඝාතනයට යොදාගත් තියුණු ආයුධ දෙක හා හෙරොයින් මත්කුඩු ගෑම් 8 මිලිගෑම් 130 ක් පොලිසිය භාරයට ගෙන ඇත.

අත්අඩංගුවට ගත් සැකකරුවන් සංවිධානාත්මක අපරාධ කරුවකු වන ඉරුපාන් නැමැත්තාගේ ගෝලයන් දෙදෙනකු බවත් ප්‍රහාරයට ලක් වූ පියා සහ පුතු සංවිධානාත්මක අපරාධකරුවකු වන ධනුක නැමැත්තාගේ සමීපතමයන් බවත් පොලිසිය කියයි.

ඉකුත් 7 වෙනි දින මෙම ඝාතනය සිදුවී තිබූ අතර අනතුරුව ප්‍රදේශය හැර ගොස් සිටි සැකකරුවන් දෙදෙනා සේදවත්ත වැල්ලම්පිටිය ප්‍රදේශයේ පාළු නිවසක් තුළ රැඳී සිටියදී අත්අඩංගුවට ගෙන ඇත.

අත්අඩංගුවට ගත් සැකකරුවන් වයස අවුරුදු 32 හා 33 කොළඹ 12 පදිංචිකරුවන් ය.