(සුජිත් හේවාජුලිගේ සහ  අංජුල මහික වීරරත්න)

පාස්කු ඉරු දින ප්‍රහාරය සම්බන්ධයෙන් අපරාධ පරීක්ෂණ දෙපාර්තමේන්තුව  සැකකරුවන්  747 දෙනකු  මේ  දක්වා අත්අඩංගුවට ගෙන ඇති බව මහජන ආරක්ෂක අමාත්‍ය ආනන්ද විජේපාල  මහතා පාර්ලිමේන්තුවේදී අද (7) පැවසීය.

මේ අතර පාස්කු ඉරු දින ප්‍රහාරයට අදාලව  සැකකරුවන් සහ සැකකාරියන් 100 කට එරෙහිව  මහාධිකරණයේ පවරා අැති නඩු 14කට  නීතිපතිවරයා  අධි චෝදනා ගොනු කර ඇති බවද ඔහු සඳහන් කළේය.

මේ සිද්ධිය සම්බන්ධයෙන් තවදුරටත්  පරීක්ෂණ පැවැත්වෙන බව කී  අමාත්‍යවරයා  ප්‍රහාරය සම්බන්ධයෙන් චැනල් 4 නාලිකාවෙන් අනාවරණය වූ කරුණුද ඊට පරිබාහිරව ඉදිරිපත්වූ කරුණුද පදනම් කරගෙන මෙසේ විමර්ශන පවත්වන බව කීය

රජය බලයට පත් වූ පසු  විමර්ශන නව අදියරයකින් ආරම්භ වී ඇති බවත්  කොළඹ මහේස්ත්‍රාත් අධිකරණයට කරුණු වාර්තා කර විමර්ශන පවත් වන  බවත්  හෙතෙම පැවසීය.

මේ සම්බන්ධයෙන් සිවිල් සාක්ෂිකරුවන් දොළොස් දෙනකු  හමුදා සමාජිකයන් හත්දෙනෙකු  පොලිස් නිලධාරීන් විසිහතර දෙනකු බන්ධනාගාර නිලධාරීන් තිදෙනෙකු ඇතුළු  48 දෙනෙකුගෙන් ප්‍රකාශ සටහන් කර ගනිමින් විමර්ශන කරගෙන යන  බවද  අමාත්‍යවරයා පැවසීය