(සුජිත් හේවාජුලිගේ)

පාසල්  කටයුතු පවත්වාගෙන යන ආකාරය සම්බන්ධයෙන් විශේෂ පෙරහුරුවක් පාසල් විවෘත කිරීමට පෙර  පැවැත්වීම කෙරෙහි   සෞඛ්‍ය අංශවල අවධානය යොමුවී ඇත.

පාසලේ කටයුතු පවත්වාගෙන යන  ආකාරය සම්බන්ධයෙන් විශේෂ  පෙරහුරුවක් ගුරුවරුන් සහ මවුපියන් එකතුවී පැවැත්වීම වැදගත් බව නියෝජ්‍ය සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය හේමන්ත හේරත් මහතා පැවැසීය.

පාසල් ආරම්භ කිරීමෙන්  පසුව රෝගීන් වාර්තාවීම අවම කර ගැනීමට නම් සෞඛ්‍ය උපදෙස් උපරිමයෙන් පිළිපැඳිය යුතු බව සඳහන් කළ විශේෂඥ වෛද්‍යවරයා  දරුවන්  පාසල් යෑමට නිවෙසින්  පිටවූ අවස්ථාවේ සිට නැවත නිවෙසට පැමිණෙන තෙක්  කළ යුතු ක්‍රියාදාමය  සම්බන්ධයෙන්  වැඩපිළිවෙලක් දැන් සිටම සකස් කළ යුතු බවද සඳහන් කළේය.

පාසල් ආරම්භ කිරීමෙන් පසු දරුවන් ට හැකි තරම් නැවත නැවතත්  පාවිච්චි කළ හැකි මුව ආවරණ ලබාදිය යුතු බවද හෙතෙම පැවැසුවේය.

දරුවන් නිවෙසින් පිටත්වූ අවස්ථාවේ සිට නිවෙසට නැවතත් පැමිණෙන තෙක් අනුගමනය කළ යුතු  ක්‍රියාමාර්ග පිළිබඳව වැඩපිළිවෙළක් සකස් කර  එය  නිවැරදිව ක්‍රියාත්මක වන්නේ දැයි සොයා බැලීමට පෙරහුරුවක් පැවැත්වීම  වැදගත් බවත් එලෙස නිසි ආකාරයට කටයුතු කළහොත් පාසල් නැවත වැසීමෙන් තොරව  දිගටම පවත්වාගෙන යා හැකි වනු ඇති බවත් හේමන්ත හේරත් මහතා  පැවැසීය.

සිසුන් පාසල් පරිශ්‍රයේදී  නිසි පරිදි කළමනාකරණය කිරීම වැදගත් බව පැවසූ නියෝජ්‍ය සෞඛ්‍ය සේවා අධ්‍යක්ෂ ජෙනරාල්වරයා දරුවන්  විවේක කාලයේදී  සහ  ආපනශාලාවේ හා ක්‍රීඩාංගණයේ සිටින විට දුරස්ථභාවය ආරක්ෂා වන ආකාරයට  කටයුතු කිරීමට අවශ්‍ය උපදෙස් ලබා දිය යුතු බවද  ප්‍රකාශ කළේය.

මේ අතර පාසල් දරුවන් සඳහා ප්‍රමිතියකින් යුතු මුව ආවරණයක්  ලබාදීමට බලාපොරොත්තු වන බවත් ඒ සඳහා අවශ්‍ය කෙරෙන  පතරොම් දැනටමත් හඳුන්වාදී ඇති බවත්  ඔහු කීවේය.

පාසල් ආරම්භයට පෙර ප්‍රවාහනය සම්බන්ධයෙන්ද  ක්‍රමවේදයක් සකස් කළ යුතු බව විශේෂඥ වෛද්‍යවරයා වැඩිදුරටත්   සඳහන් කළේය.