(දයාරත්න ඇඹෝගම)

කෘෂිකර්ම පර්යේෂණ නිෂ්පාදන සහකාර නිලධාරිණියන් දෙදෙනෙකුට පලුගස්වැව නගරයේදි අද (14) පහරදි තුවාල සිදුකළැයි පැමිණිල්ලක් ලැබී ඇතැයි හබරණ පොලීසිය කියයි.

පලුගස්වැව ප්‍රාදේශීය ලේකම් කාර්යාලයේ අද (14)දින පැවති කෘෂිකර්ම කමිටු රැස්විමට සහභාගිවි ආපසු යතුරැ පැදියෙන් සිය නිවෙස්වලට යමින් සිටියදි පුද්ගලයෙකු විසින් මෙම නිලධාරිණියන් දෙදෙනාට පහරදි තිබුණි.

එම පහර කෑමෙන් තුවාල ලැබු ආසිරිගම,එප්පාවල යන ලිපිනයේ පදිංචි කෘෂිකර්ම පර්යේෂණ නිෂ්පාදන සහකාර නිලධාරිණිය ප්‍රතිකාර සදහා හබරණ රෝහලට ඇතුලත් කොට ඇති අතර හබරණ පාර,පලුගස්වැව යන ලිපිනයේ පදිංචි අනෙක් නිලධාරිණිය පුද්ගලික වෛද්‍ය මධ්‍යස්ථානයකින් ප්‍රතිකාර ලබාගෙන  ඇතැයි එම පැමිණිල්ලේ සඳහන්ය.

පොහොර සහනාධාරය සදහා ලැබිය යුතු මුදල් නොලැබිම සම්බන්ධයෙන් සිදුවු බහින් බස්විමක් මෙම පහරදිමට හේතුවි ඇතැයි පොලිසිය කියයි.

මෙම නිලධාරිණියන් දෙදෙනාට පහරදුන් පුද්ගලයා මේවන විට හදුනා ගෙන ඇති බවත් ඔහු අත්අඩංගුවට ගැනිම සදහා විමර්ශණයක් ආරම්භ කොට ඇති බවත් මේ පිළිබදව පරික්ෂණ පවත්වන හබරණ පොලිසිය පැවසිය.