(රොමේෂ් මධුෂංඛ)

යාපනය කයිතඩි බටහිර ප්‍රදේශයේදී දින දෙකකට පෙරදී පැහැරගෙන ගිය සුඛෝපභෝගී වෑන් රථයක් යාපනය මීසාලෙයි පොදු සුසාන භූමිය අසල දමාගොස් තිබියදී සොයාගත් බව චාවකච්චේරි පොලීසිය පවසයි.

මෙම වෑන් රිය කයිතඩි බටහිර ප්‍රදේශයේදී වෑන් රථයේ හිමිකරු විසින් විකිණීම සඳහා දමා තිබූ දැන්වීමකට අනුව පසුගිය 04 වනදා පුද්ගලයින් දෙදෙනෙකු වෑන්රථය මිලට ගැනීමට පැමිණ එය පරික්ෂා කොට වෑන්රථයෙන් පරික්ෂණ ගමන්වාරයක් සඳහා යාමට හිමිකරුගෙන් යතුර ඉල්ලා පනගන්වාගෙන ගොස් ඇති අතර එහිදී වෑන් රථය රැගෙන ගිය පිරිස් ආපසු පැමිණ නොමැත.

කෙසේ වෙතත් අදාල පිරිස් හා වෑන් රථය පැහැරගැනීම පිළිබඳව එහි හිමිකරු විසින් චාවකච්චේරි පොලීසියට පැමිණිල්ලක්ද දමා ඇති අතර ඊයේ (06) සවස මීසාලෙයි පොදු සුසාන භූමිය අසලදී අංකතහඩු නොමැති වෑන් රථයක් හිමිකරුවන් නොමැතිව දමාගොස් ඇති බවට පොලීසියට ප්‍රදේශවාසියෙකු විසින් දැනුම් දී ඇත.

අනතුරුව අදාල ස්ථානයට ගිය පොලිස් නිලධාරීන් විසින් වෑන් රථය පරික්ෂා කොට පැහැරගෙන ගිය වෑන්රථයේ හිමිකරුට දැනුම්දී ඇති අතර පසුව හිමිකරු එම ස්ථානයට පැමිණ 0 4 වනදා පැහැරගෙන ගිය වෑන් රථය එය බවට හඳුනාගනු ලැබීය.

කෙසේ වෙතත් වෑන් රථය පැහැරගෙන ගිය පිරිස් කව්රුන්දැයි යන්න මෙතෙක් අනාවරනය වී නොමැති අතරම වෑන් රථයේ අංක තහඩු ගලවා කිසියම් ජාවාරම් කටයුත්තක් සඳහා සැකකරුවන් විසින් වෑන් රථය යොදාගත්තේද යන්න පිළිබඳව සැක සහිත බවටද පොලීසිය පැවසීය.

වෑන් රථය මිලට ගැනීමට පැමිණි පිරිස් සොයා පුලුල් පරික්ෂණයක් අරඹා ඇති බවට චාවකච්චචේරි පොලීසිය වැඩිදුරටත් පැවසීය.