(නිමල කොඩිතුවක්කු)

වෙළඳපොලේ බිත්තර, කුකුලුමස්, මිල විශාල වශයෙන් ඉහල ගොස් ඇතැයි පාරිභෝගිකයෝ පවසති.

බිත්තරයක් රුපියල් 38 සිට 40 දක්වා මිලකට අලෙවි වන අතර කුකුලු මස් කිලෝවක් රුපියල් 1150ත් 1200ත් අතර මිලකට අලෙවි වන බව  ඔව්හු සඳහන් කරති.

මේ අතර සුපිරි වෙළඳසැල්වල බිත්තර දහයේ  ඇසුරුමක්  රුපියල් 460ත් 480ත් අතර මිලකට අලෙවි වන බවද පාරිභෝගිකයෝ  පෙන්වා දෙති.

කුකුලු කෑම මිළ ඉහළ යාම බිත්තර සහ කුකුලු මස් මිළ විශාල වශයෙන් ඉහළ යාමට හේතුවී ඇතැයි නිශ්පාදකයෝ සඳහන් කරති.

මේ සම්බන්ධයෙන් කළ විමසීමකදී අදහස් දැක්වූ සමස්ත ලංකා බිත්තර නිෂ්පාදකයින්ගේ සංගමයේ සභාපති ආර්. එම්. සරත් රත්නායක මහතා ප්‍රකාශ කළේ රුපියල් 65 ට තිබූ කුකු-ලු කෑම  කිලෝවක මිල මේ වනවිට රුපියල් 225 දක්වා  තුන්ගුණයකින් පමණ ඉහළ ගොස් ඇති බවයි.

ඒ අනුව බිත්තරයක නිශ්පාදන මිල රුපියල් 32ත් 33ත් අතර වන බවත්  බිත්තරයක ප්‍රවාහන වියදම රුපියල්  3 ක් පමණ වන බවත් ඔහු සඳහන් කළේය.

බිත්තරයක් රුපියල් 50ක් සහ කුකුලුමස් කිලෝවක් රුපියල් 1500ක් වනු ඇති බවට පැතිර යන කටකතාවල සත්‍යතාවයක් නොමැති බවත් ඔහු තවදුරටත් පැවසීය.