(කේ බුද්ධික කුමාරසිරි)

කුලී පදනම මත ලබා ගත් නිවසක මාස තුනක කාලයක් තිස්සේ පවත්වාගෙන ගිය බලපත් රහිත මත්පැන් නිශ්පාදනාගාරයක් කඩුවෙල  ප්‍රදේශයේ දී වටලා එක් සැකකරුවකු සමගින් මත්පැන් බෝතල් තොගයක් අද (28) දින අත් අඩංගුවට ගත් බව සුරාබදු විශේෂ මෙහෙයුම් ඒකකය පවසයි.

ආනයනය කළ  විස්කි බවට පවසා මෙම මත්පැන් බෝතල් ඉහල මිල ගණන් යටතේ අලෙවි කර ඇති බවට අනාවරණය වී ඇත.

ලද තොරතුරක් මත උපාය දූතයෙකු යොදවා මත්පැන් බෝතල් කිහිපයක් මිලදී ගැනීම සදහා මීගමුව ප්‍රදේශයේ සැකකරු හමු වී එම මත්පැන් බෝතල් විකිණීමට යාමේදී සැකකරු අත් අඩංගුවට ගෙන සිදුකල ප්‍රශ්න කිරීමේදී ලද තොරතුරු මත එම නිශ්පාදනගාරය වැටලීමට කටයුතු කර ඇත

ඉතා ජනාකීර්ණ සුඛෝපභෝගී නිවාස රැසකින් වට වූ ස්ථානයක පාලුවට ගිය නිවසක මෙම මත්පැන් නිශ්පාදනාගාරය පවත්වාගෙන ගොස් තිබූ බවද එම ඒකකය පවසයි.

එම නිශ්පාදනාගරයෙහි තිබී සාදන ලද මත්පැන් ස්ප්‍රීතු ලීටර් 114  ,  අධි සැර ස්ප්‍රීතු ලීටර් 76  සහ නිමි බෝතල් 54 ක්  හිස් බෝතල් 96 වර්ණක කෑන් 01 ලේබල් මූඩි සහ නිශ්පාදනයට අවශ්‍ය යාන්ත්‍රික උපකරණ කිහිපයක් අත් අඩංගුවට ගෙන ඇත.

සැකකරු මීරිගම ප්‍රදේශයේ පදිංචිකරුවකු වන 54 හැවිරිදි පුද්ගලයෙකි. එම සැකකරු මහේස්ත්‍රාත් අධිකරණය වෙත ඉදිරිපත් කිරීමට නියමිත වේ.