(කේ බුද්ධික කුමාරසිරි)

හයිලෙවල් මාර්ගයේ ගොඩගම ප්‍රදේශයේ දී අද (17) අළුයම මෝටර් රථයක් මාර්ගයෙන් ඉවතට පැන ලබුගම ජලාශයේ සිට කොළඹට ජලය රැගෙන යන විශාල නලයක ගැටීමෙන් සිදු වූ අනතුරින් නල මාර්ගය පුපුරා ඇතැයි මීගොඩ පොලිසිය පවසයි.

ජල නලයට දැඩි ලෙස හානි වීම නිසාවෙන් විශාල ජල කදක් ඉහලට විසි කරමින් ජලය අපතේ යාමක් සිදුව ඇතැයි ද ජලයේ වේගය නිසාවෙන් එම ස්ථානයේ තිබූ විදුලි කණුවක් ද කැඩී මාර්ගයට වැටුණු බවද පොලිසිය පවසයි.

අනතුරට පත් මෝටර් රථයෙහි සිටි රියදුරු ඇතුළු පුද්ගලයන් දෙදෙනකු හෝමාගම මූලික රෝහලට ඇතුලත් කළ බවත් ඔවුන් දෙදෙනාට සුළු තුවාල පමණක් සිදුව තිබූ බවත් පොලිසිය පවසයි.

අදාල මෝටර් රථය අධික වේගයකින් පැමිණ මාර්ගයෙන් ඉවතට පැන ජල නලයෙහි ගැටී යළි ගොඩබිමට වැටී උඩුකුරුව පෙරලී ඇත.

මෙම ජල නලයට දැඩි ලෙස හානි සිදුවීම නිසාවෙන් කොළඹට ජලය සැපයීම යම් කාල සීමාවක් ප්‍රමාද විය හැකි බව ජල සම්පාදන මණ්ඩලයේ මහරගම කලාප කාර්යාලයේ නිළධාරියෙක් පැවසීය.