(සුජිත් හේවාජුලිගේ සහ අංජුල මහික වීරරත්න)

දසවැනි පාර්ලිමේන්තුව සඳහා ආංශික අධීක්ෂණ කාරක සභා හතක් ස්ථාපිත කිරීමට ගෙන ආ  යෝජනාවට පාර්ලිමේන්තුවේ අනුමැතිය හිමිවිය.

පාර්ලිමේන්තුවේ තේරීම් කාරක සභාව ගත් තීරණයක් අනුව සභානායක, අමාත්‍ය බිමල් රත්නායක මහතා ඊට අදාළ යෝජනාව පාර්ලිමේන්තුවට ඉදිරිපත් කළේය.

එසේම එම ආංශික අධීක්ෂණ කාරක සභාවල සභාපතිධුර, ආණ්ඩු පක්ෂය සහ විපක්ෂය අතර බෙදීයාම පිළිබඳවද  එකඟත්වයක් ඇතිවී තිබේ.

මේ අනුව ආර්ථික සංවර්ධනය සහ අන්තර්ජාතික සබඳතා පිළිබඳ ආංශික අධීක්ෂණ කාරක සභාව, සෞඛ්‍ය, ජනමාධ්‍ය සහ කාන්තා සවිබලගැන්වීම පිළිබඳ ආංශික අධීක්ෂණ කාරක සභාව, විද්‍යා, තාක්ෂණය සහ ඩිජිටල් පරිණාමනය පිළිබඳ ආංශික අධීක්ෂණ කාරක සභාව සහ රාජ්‍ය පාලනය, යුක්තිය සහ සිවිල් ආරක්ෂණය පිළිබඳ ආංශික අධීක්ෂණ කාරක සභාව යන ආංශික අධීක්ෂණ කාරක සභා හතරෙහි     සභාපතිධුර ආණ්ඩු පක්ෂයට ලබා දීමට එකඟත්වය පළවිය.

එසේම, යටිතල පහසුකම්  සහ උපාය මාර්ගික සංවර්ධනය පිළිබඳ ආංශික අධීක්ෂණ කාරක සභාව, අධ්‍යාපනය, ශ්‍රම බලකාය සහ මානව ප්‍රාග්ධනය පිළිබඳ ආංශික අධීක්ෂණ කාරක සභාව සහ පරිසරය, කෘෂිකර්මය සහ සම්පත් තිරසාරත්වය පිළිබඳ ආංශික අධීක්ෂණ කාරක සභාව යන  කාරක  සභා  තුනෙහි    සභාපතිධුර විපක්ෂයට ලබාදීමටද  මෙහිදී අනුමතිය හිමිවී අැත.