( තිළිණි ද සිල්වා සහ රංජන් කටුගම්පොළ )

36 හැවිරිදි පුද්ගලයෙකුට රබර් කිරි කපන පිහියකින් ඇන   ඝාතනය  කර, තමාට එරෙහිව  සාක්ෂි නොදෙන ලෙස එම ඝාතනය දුටු නිවැසියන්  පිරිසකට මරණීය තර්ජන කල  "මොල්ලා"  නමැති විත්තිකරුට  කළුතර මහාධිකරණය දුන් මරණ දඩුවම    අනුමත කරමින් අභියාචනාධිකරණය නියෝගයක් නිකුත් කරනු ලැබ ඇත 

තමාට එරෙහිව පැනවූ මරණ දඩුවම  බල රහිත කරන ලෙස ඉල්ලා විතාන කංකානමලාගේ අජිත් කුමාරසිරි  "මොල්ලා"  නමැත්තා ගොනු කල ප්‍රතිශෝධන  පෙත්සමක් සම්බන්ධයෙන් පැවති දීර්ඝ නඩු විභාගය කින් පසුව එහි  තීන්දුව ඊයේ (23)  ලබා දෙමින්  මෙම නියෝගය  නිකුත් කරන ලදි.

නිශ්ශංක බන්දුල කරුණාරත්න, සහ රත්න ප්‍රිය ගුරුසිංහ  යන අභියාචනාධිකරණය විනිසුරු මඩුල්ල හමුවේ මෙම පෙත්සම විභාගය සිදු කෙරිණි. 

කළුතර ඇල්ලමුල්ල ප්‍රදේශයේ දී 2001 ජූනි 28 වැනිදා  හේවගේ  දොන් දයානන්ද  නමැත්තා රබර් කිරි කපන පිහියකින් ඇන මරා දැමීම සම්බන්ධයෙන්  නීතිපතිවරයා  විසින්  විත්තිකරුට එරෙහිව  නඩු පවරා තිබුණි.

පිහි ඇනුම් කෑ මරණකරු යාබද නිවසකට දිවගොස් ඇති අතර එහි පැමිණි  විත්තිකරු  තමන් ට එරෙහිව  සාක්ෂි ලබා දුනහොත්  මරා දමන බවට එහි නිවැසියන් ට තර්ජනය කල බවට  නඩු  විභාගයේදී  අනාවරණය විය.

එම නඩුව  විභාග කල  පූර්වගාමී විනිසුරු  ප්‍රීති පද්මන් සූරසේන  මහතා එහි  තීන්දුව ලබා දෙමින්  විත්තිකරු  වැරැදිකරු බවට තීන්දු කර  මරණ දඩුවම් නියම කලේය.

එකී තීන්දුව  බල රහිත කොට තමන් නිදොස් කොට නිදහස් කරන ලෙස ඉල්ලා මෙම පෙත්සම ගොනු කර තිබුණි.

මරණකරුගේ මරනාසන්න ප්‍රකාශය ගැන  එම නිවැසියන්  ලබා දුන්  සාක්ෂි  විශ්වාසයෙන් තොර බවට  මෙම  ප්‍රතිශෝදන පෙත්සම් විභාගයේදී  විත්තිකාර අභියාචක වෙනුවෙන් පෙනී සිටි ජනාධිපති නීතීඥ සාලිය පීරිස් මහතා සඳහන් කළේය. එසේම පරිවේශනීය සාක්ෂි  මත පිහිටා  දඩුවම්  පැමිණවීමට තරම්  විත්තිකරු  හඳුනා ගැනීමට සාක්ෂි කරුවන්  අසමත් වී ඇති බව ට ඒ මහතා  කරුණු ඉදිරිපත් කලේය.

එම කරුණු  දැක්වීම්  පිළිගැනීම  ප්‍රතික්ෂේප  කිරීමට තීරණය කල බව මෙම  අභියාචනාධිකරණ තීන්දුවෙහි සදහන් වේ.

ජ්‍යෙෂ්ඨ නියෝජ්‍ය සොලිසිටර් ජෙනරාල් දිලීප පීරිස් මහතා  නීතිපතිවරයා වෙනුවෙන් පෙනී සිටියේය.